Милијарди во добивки од криптовалути исчезнаа за неколку часа

На криптопазарот се забележани рекордни ликвидации, само неколку дена откако биткоин достигна највисока вредност во историјата. Најмногу на тоа придонесоа новите царини на американскиот претседател Доналд Трамп.

Цените на криптовалутите во петокот нагло паднаа откако Трамп најави дополнителни царини од 100 проценти на кинескиот увоз и извозни ограничувања на софтвер. Падот започна брзо и потоа уште повеќе се продлабочи, а според платформата „Коинглас“ (Coinglass), станува збор за „најголемиот настан на ликвидации во историјата на криптопазарот“.

Иако слабоста на пазарот беше забележлива и пред петокот, објавата на Трамп предизвика пад на вредноста на биткоин за повеќе од 12 проценти. Најголемата криптовалута, која на почетокот од неделата достигна рекордна вредност од над 125.000 долари, во сабота наутро по лондонско време падна под 113.000 долари (во моментов се движи околу 112.000).

Од петокот до саботата беа избришани облози во вредност над 19 милијарди долари, а кај повеќе од 1,6 милиони инвеститори биле исполнети условите за ликвидација, покажуваат податоците на „Коинглас“. Од тоа, повеќе од седум милијарди долари позиции биле продадени за помалку од еден час тргување во петокот.

„Коинглас“ на мрежата X наведе дека вкупниот број веројатно е уште поголем, бидејќи берзите не ги пријавуваат овие налози секогаш во реално време. Најголемата криптоберза во светот, „Бајненс“ (Binance Holdings Ltd.), според објавата, известува само за една наредба за ликвидација во секунда.

„Сега вниманието се насочува кон изложеноста на спротивните страни и дали ова може да предизвика поширока пазарна контаминација“, рече Брајан Стругатс, главен трговец во МК (Multicoin Capital). Тој додаде дека некои проценуваат дека вкупните ликвидации надминуваат 30 милијарди долари.

Следното клучно ниво

Следното поголемо ниво на поддршка за биткоин е на 100.000 долари, вели Керолајн Морон, коосновачка на компанијата ОМ (Orbit Markets), при што пад под таа граница би значел крај на тригодишниот „биковски“ циклус. Пазарот на опции на биткоин се согласува со тоа — најмногу „пут“ опции се наоѓаат на нивото од 110.000 долари, а следните по големина на 100.000 долари, покажуваат податоците од платформата „Дерибит“ (Deribit).

Засилувањето на реториката меѓу САД и Кина предизвика шок на светските пазари, што ја намали вредноста на акциите, нафтата и криптовалутите, додека истовремено го поттикна бегството на инвеститорите кон безбедни засолништа како злато и американски обврзници.

„Во петокот избувна нова трговска војна меѓу Кина и САД, што предизвика несигурност на пазарите и распродажба на ризичен капитал“, рече Рави Доши, коосновач на одделот за тргување во брокерската фирма „Фалкон Х“ (FalconX). Тој додаде дека нивниот тим за деривати тој ден забележал исклучително голем интерес за заштита од пад на цените.

Дејвид Џонг, извршен директор на платформата за алгоритамско тргување со криптовалути „Тред.фај“ (Tread.fi,) рече дека пазарот доживува „црн лебед“.

Винсент Лиу, главен инвестициски директор во КР (Kronos Research), изјави дека падот „е поттикнат од стравот од царини меѓу САД и Кина, но продлабочен поради преголема изложеност на институциите“.