Нов историски рекорд: Биткоинот надмина 125.000 долари

Биткоинoт постави нов рекорд бидејќи пошироката финансиска еуфорија поврзана со затворањето на американската влада ја поттикна најголемата криптовалута во светот.

Токенот достигна до 125.689 долари во неделата во Азија, надминувајќи го претходниот рекорд поставен на 14 август, поддржан од растот на американските акции и обновените инвестиции во фондови поврзани со биткоин. Инвеститорите шпекулираат дека затворањето, кое започна во средата, ќе ги насочи вложувањата кон „безбедни засолништа“ — тренд кој пазарните учесници го нарекуваат „трговија со девалвација“.

„Со многу средства — вклучувајќи акции, злато, па дури и колекционерски предмети како покемон картички — кои достигнуваат рекордни вредности, не е изненадување што биткоинот има корист од наративот за девалвација на доларот,“ рече Џошуа Лим, ко-директор на пазарите во крипто брокерската фирма „Фалкон икс“.

Дополнителен поттик за оптимизмот е историскиот успех на биткоинот кој секогаш се случува во месец октомври, па го доби прекарот „Аптобер“ (Uptober). Токенот бележи раст во девет од последните десет месеци октомври.

Најголемата дигитална актива според пазарна вредност го достигна претходниот максимум од 124.514 долари на 14 август, а сега е зголемена за повеќе од 30 отсто оваа година.

Bloomberg

Биткоинот бележи стабилен раст во текот на изминатата година, благодарение на поволната законодавна клима во Вашингтон под водство на претседателот Доналд Трамп. Јавни компании, предводени од „Стратеџи“ на Мајкл Сејлор, ја зголемија побарувачката следејќи ја се попопуларната корпоративна стратегија на складирање на оригиналната криптовалута. Овој пристап се прошири и кај помалите конкуренти, како етер, што доведе до поширок раст на дигиталните средства.

Американските акции достигнаа рекордни вредности во петокот, поттикнати од нов бран на големи договори и партнерства во областа на вештачката интелигенција, притоа игнорирајќи ги изгледите за продолжен прекин на работата и песимистичките податоци за деловната активност. Обврзниците и доларот паднаа, додека златото беше на пат кон седмо неделно зголемување, поттикнато од купувања од централните банки во услови на опаѓање на каматните стапки во САД и постојани инфлациски грижи.

 „Овој пат прекинот е важен,“ рече Џеф Кендрик, глобален раководител за истражување на дигитални средства во „Стандард чартерд“, додавајќи дека очекува биткоинот да порасне во овој период. Тој истакна дека биткоинот беше „во поинаква позиција“ за време на претходниот прекин од 2018 до 2019 година, кога токенот се тргуваше помалку во согласност со традиционалните ризични средства.