Бран на ликвидации „тежок“ повеќе од 1,5 милијарда долари повторно ја истакна кревкоста на криптопазарот, одвивајќи се без јасна причина, додека цените на опциите укажуваат на зголемена нестабилност во наредниот период.
Оваа распродажба, една од најголемите годинава, по месеци шпекулативни скокови, ги принуди трговците да ги затворат левериџ позициите во етер и други криптовалути, оставајќи ги во исчекување нови осцилации. Договорите за опции што носат профит при нагли промени бележат висока побарувачка, што ја нагласува напнатата атмосфера на пазарот на дигитална актива, додека акциите и другите ризични средства повторно растат.
Етерот, втората најголема криптовалута, падна за околу 0,9 проценти во Азија во вторникот наутро, откако во претходната сесија ослабе до девет проценти, кога беа збришани речиси половина милијарда долари од оптимистички обложувања. Биткоинот падна за 0,8 проценти.
„Пазарот се консолидира по остриот пад од вчера, но расположението и понатаму е доста нервозно“, изјави Каролин Морон, коосновачка на „Орбит маркетс“ (Orbit Markets). Пад на биткоинот под 110.000 долари и на етерот под 4.000 долари би можел да доведе до нова распродажба, додаде таа.
Истекување на опциите за биткоин
Bloomberg
Последиците се особено видливи на пазарот на опции за биткоин. Најголемите облози на договори што истекуваат кон крајот на месецот се групирани во два екстрема: заштита од пад под 95.000 долари и облози на скок над 140.000 долари, според податоци од „Дерибит“ (Deribit). Двете позиции се доволно големи за да покажат дека трговците очекуваат турбуленции, а не стабилност.
Опциите за биткоинот и етерот што треба да истечат в петок се вредни околу 23 милијарди долари, што е една од најголемите вредности досега, покажуваат податоците од „Дерибит“. Тоа дополнително поттикнува претпазливо расположение.
Краткорочните облози стануваат популарни, одразувајќи став дека наглите притисоци или присилните продажби ќе ги одредат следните движења. Овие „out-of-the-money“ договори (опциони договори без внатрешна вредност) се поевтини за купување, но носат профит само ако цените нагло осцилираат, со што самата нестабилност станува предмет на тргување.
Голем дел од годинешниот раст на цените беше поттикнат од јавни компании што акумулираат криптоактива. Нивните купувања на токени забавија бидејќи падот на цените на акциите ја ограничи можноста за собирање свеж капитал. Тоа ја ослабе побарувачката и дополнително го притисна последниот пад на вредноста на дигиталната актива.
Расположението на криптопазарот останува кревко
Bloomberg
„Генерално, последниот пад го гледаме како ограничено намалување на левериџот во криптото“, изјави Грифин Сирс, шеф на деривати во „Фалкон екс“ (FalconX). „Сепак, зголемениот левериџ во однос на минатата година сè уште остава доволно простор за екстремни движења на пазарот.“
Знаците на тој левериџ јасно се гледаат на пазарот на перпетуални фјучерси, вид на дериватен договор што го претпочитаат криптотрговците. Отворениот интерес (бројот на отворени позиции) нагло порасна на „Бајненс“ во последните месеци, додека етерот бележи подем на шпекулативната активност, во која дневните трговци играат видлива улога.
„Остриот пад на етерот го одразува прекумерниот левериџ во услови на ниска ликвидност, а не некој фундаментален катализатор, при што етерот се враќа на својата историска улога на ‘бета’ индикатор на расположението во секторот на дигитална актива за време на стресни периоди“, изјави Крис Њухаус, директор за истражување во „Ергона“ (Ergonа), компанија специјализирана за децентрализирани финансии.
Сепак, нестабилноста на биткоинот годинава остана донекаде ограничена, што ги одразува неговиот подлабок пазар и растечката улога како заштита во портфолиото на традиционалните инвеститори. Со намалување на каматните стапки од страна на Федералните резерви, аналитичарите од индустријата очекуваат продолжување на приливот на капитал, дури и ако компаниите што акумулираат крипто забават со купувањата.
„Сеопфатно, очекуваме дека движењата на биткоинот сè повеќе ќе го следат движењето на акциите и макроризиците“, рече Сирс.
.webp){kind=icon}
Во моментов нема коментари за веста. Биди прв да коментира...