Биткоинот во понеделникот ослабе на азиските пазари, откако цените на нафтата нагло пораснаа поради новите американски напади врз Иран, што повторно ги засили стравувањата од зголемување на инфлацијата.
Главната криптовалута падна за дури 2,4 проценти, на 62.600 долари, заклучно со 12:45 часот по сингапурско време. Со тоа биткоинот повторно се спушти под својот 200-неделен подвижен просек, технички показател што може да укажува на подолготраен надолен тренд на пазарот. Втората најголема криптовалута, етер, загуби 2,5 проценти од својата вредност.
Bloomberg
„Падот на цените следува по послабото тргување со американските фјучерси на акции и скокот на цените на нафтата поради заострувањето на тензиите со Иран“, изјави Ричард Галвин, извршен претседател на инвестициската криптокомпанија ДАКМ (DACM).
Новите судири меѓу Соединетите Американски Држави и Иран ја зголемија загриженоста дека растот на цените на нафтата повторно би можел да ја поттикне инфлацијата и да доведе до зголемување на каматните стапки. Инвеститорите оваа недела внимателно ќе ги следат податоците за инфлацијата на потрошувачките цени во САД, како и обраќањето на претседателот на Федералните резерви (Фед), Кевин Ворш, во потрага по сигнали за идниот правец на монетарната политика на американската централна банка.
„Ако инфлацијата биде повисока од очекуваното, тоа веројатно ќе ги зајакне очекувањата дека Федералните резерви ќе ги зголемат каматните стапки до крајот на годината, што би имало негативно влијание врз биткоинот“, изјави Тони Сајкамор, аналитичар во компанијата „ИГ Австралија“ (IG Australia). Како што додаде тој, доколку податоците бидат во согласност со очекувањата или послаби, тоа би ги поддржало претходните оцени на Ворш дека инфлациските притисоци се намалуваат.
САД во неделата извршија нови ракетни напади врз Иран, продолжувајќи ја серијата на меѓусебни удари меѓу Вашингтон и Техеран, додека двете страни изнесуваа спротивставени тврдења за тоа дали Ормускиот Теснец е отворен за поморски сообраќај. Цената на нафтата брент порасна за 4,4 проценти, на повеќе од 79 долари за барел, бидејќи ескалацијата на конфликтот ги зголеми стравувањата од можни нарушувања во снабдувањето.
Сепак, минатата недела беше забележан нето-прилив од 197,4 милиони долари во спот берзанските фондови (ЕТФ) за биткоин што котираат на американските берзи, што претставува прв позитивен неделен прилив по девет последователни недели на одлив на капитал.
.webp){kind=icon}
