„Стратеџи“ мора да запре со акумулацијата на биткоини за да го смири пазарот

Машината за купување биткоин на Мајкл Сејлор, компанијата „Стратеџи“ (Strategy Inc), треба да престане со купување на таа криптовалута ако сака да ја врати довербата на пазарот во своите акции.

Ова го смета Хулио Морено, директор за истражување во „Криптоквант“ (CryptoQuant), кој тврди дека приоритет на компанијата „Стратеџи“ треба да биде обновување на нејзината парична резерва во долари, наместо продолжување со купување биткоин секогаш кога капиталот е достапен. На компанијата ѝ е потребен посистематски пристап при одредувањето на моментот за купување биткоин, заснован на фундаментални показатели, наведе тој во истражувачкиот извештај.

„Купувањето на врвовите на циклусите и акумулацијата за време на мечкини пазари доведоа до брз раст на нереализираните загуби и влошување на фундаменталните показатели на STRC“, изјави Морено.

Компанијата „Стратеџи“ се наоѓа под притисок по повеќемесечната распродажба на биткоин, која предизвика загриженост околу способноста на компанијата да ги исполни своите финансиски обврски.

Нејзините приоритетни акции STRC минатата недела паднаа на 82,50 долари, што претставува рекорден дисконт од 17,5 проценти во однос на нивната номинална вредност од 100 долари, додека на затворањето на тргувањето во вторникот беа со дисконт од речиси 13 проценти. Нејзините обични акции, MSTR, исто така паднаа на најниското ниво од мај 2024 година, нагласувајќи ја загриженоста на инвеститорите во врска со моделот на финансирање на компанијата.

STRC на компанијата „Стратеџи“ продолжува да се тргува со голем дисконт

За моделот на компанијата „Стратеџи“ да остане одржлив, биткоинот мора да расте побрзо отколку што се зголемуваат обврските на компанијата. Во овој момент компанијата има номинална загуба од 11 милијарди долари на вкупните средства.

„Стратеџи“ исплаќа годишен принос од 11,5 проценти на STRC, кој се усогласува секој месец и повеќепати бил зголемуван од почетокот на програмата, со цел да привлече капитал кој може да се користи за купување биткоин. Врз основа на моменталната дисконтна цена на STRC, ефективниот принос изнесува 13,17 проценти, според податоците од нејзината веб-страница.

„Стратеџи“ не е обврзана да продава биткоин за да ја поддржи цената на STRC. Може да го зголеми дивидендниот принос или да издаде повеќе обични акции за да ја покаже својата способност да продолжи со исплата на дивиденди, а тоа се алатки кои веќе се користат. Сепак, тие мерки не го решаваат основниот проблем со послабото парично покритие и растечките обврски.

Корекцијата на биткоинот за време на мечкиниот пазар се совпаднала со „истовремено исцрпување“ на паричната резерва на компанијата „Стратеџи“, изјави Морено. Притисокот се зголеми откако компанијата во мај откупи конвертибилни сениор обврзници со каматна стапка од нула проценти и рок на достасување во 2029 година, во вредност од 1,5 милијарди долари, со што „сериозно ја намали паричната потпора“ достапна за поддршка на дивидендите на STRC, додаде тој.

Bloomberg

Патот кон враќање на номиналната вредност „не е едноставен“, смета Морено. Паричната резерва на компанијата во долари паднала за 36 проценти од почетокот на 2026 година, на 1,4 милијарди долари.

Обновувањето на паричната резерва на околу 2,8 милијарди долари, што одговара на покритие на дивидендите за 24 месеци, претставува „неопходен услов“ за закрепнување на STRC, смета Морено.

Компанијата „Стратеџи“, порано позната како „Микро Стратеџи“ (MicroStrategy), изгради едно од најголемите корпоративни портфолија на биткоин во светот. Како што слабее побарувачката од други големи купувачи на биткоин, вклучувајќи ги американските фондови со кои се тргува на берза (ЕТФ), пазарот станува сè позависен од куповната моќ на компанијата „Стратеџи“.

На почетокот на јуни, сепак, компанијата објави дека продала 32 биткоина, што беше нејзина прва продажба од 2022 година. Иако занемарлива во споредба со залихите вредни околу 57 милијарди долари, таа продажба имаше симболична тежина бидејќи ја поткопа приказната на Сејлор дека никогаш нема да продава.

Оттогаш компанијата продолжи да купува биткоин.

„Стратеџи“ во периодот од 15 до 21 јуни купила криптовалути во вредност од 34,9 милиони долари, се наведува во документ поднесен во понеделникот. Купувањето било целосно финансирано со продажба на обични акции од класа А, што претставува трета последователна недела во која компанијата се потпира на обичен капитал и покрај претходните ветувања дека ќе премине на трајни приоритетни акции како инструмент за финансирање. „Стратеџи“ исто така ги искористила тие приходи за да ја зголеми својата резерва за 300 милиони долари.