Пресврт на Сејлор - „Стратеџи“ веќе не складира биткоини, туку кеш

Мајкл Сејлор продолжува да го врти својот механизам за акумулација на биткоин во спротивна насока.

„Стратеџи“ (Strategy Inc.) во текот на изминатата недела продаде обични акции во вредност од 333,7 милиони долари за да финансира откуп на приоритетни акции и да ги зголеми готовинските резерви, наместо парите да ги искористи за нови купувања на криптовалути. Во седумте дена заклучно со 16 август, компанијата ниту купувала ниту продавала биткоин, се наведува во документот што компанијата во понеделникот го поднела до регулаторот. „Стратеџи“ нема купувано биткоин од средината на јуни.

Сејлор, извршниот претседател на „Стратеџи“, кон крајот на јуни објави дека компанијата преминува од моделот на акумулација на биткоин, кој токму тој го осмисли и промовираше, кон пристап насочен на управување со капиталот. Во текот на последните пет недели компанијата продаде околу 2,1 милијарди долари во обични акции, додека истовремено откупи приближно 347 милиони долари од своите приоритетни STRC акции. „Стратеџи“ во тој период исто така продаде биткоини во вредност од 213,3 милиони долари.

„Стратеџи“ во текот на последната недела ја зголеми својата готовинска резерва на 4,8 милијарди долари, откако дел од приходите искористи за плаќање камати на приоритетните акции. Компанијата поседува биткоини во вредност од околу 59 милијарди долари.

Сејлор во мај првпат ја навести можноста за отстапување од своето правило „никогаш не продавај“, кога сè поголемиот притисок предизвикан од падот на цената на биткоинот го доведе неговиот модел на финансирање - продажба на акции и приоритетни акции со премија - речиси до целосен застој.

Акциите на „Стратеџи“ во понеделникот пораснаа за пет проценти, на 97,68 долари, додека биткоинот зајакна за околу два процента, на приближно 64.300 долари. Акцијата во изминатата година падна за околу 73 проценти, додека биткоинот во истиот период ослабе за 45 проценти.