Трамп порано беше скептик за криптовалутите. Што се смени?

Претседателот на САД, Доналд Трамп, некогаш велеше дека биткоинот „изгледа како измама“ и дека вредноста на криптовалутите е „заснована на ништо“.

Денес ситуацијата е сосема поинаква. Од враќањето на функцијата во јануари, Трамп потпиша извршни наредби што ја поддржуваат индустријата, овозможи проширување на владината употреба на дигитални средства и потпиша закон што ги легитимира стабилните коини. Тој и неговото семејство влегоа длабоко во криптосветот.

По неговата изборна победа во ноември, цените на токените, особено на биткоинот, нагло скокнаа – достигнувајќи рекорд од над 125.000 долари во август.

Што стои зад промената на ставот на Трамп кон криптото?

Промената започна постепено, со лансирање четири колекции на NFT (незаменливи токени) со негови ликови во херојски претстави.

До изборната кампања во 2024 година, тој целосно го прифати криптонаративот, ветувајќи дека ќе биде „пробиткоин претседател“ и дека САД ќе станат „крипто-суперсила“. Според него, криптото е клучно за конкурентноста на Америка.

Bloomberg

Кој го финансира криптокампот на Трамп?

Криптозаедницата масовно го поддржа Трамп. Илон Маск донираше 239 милиони долари преку политички комитет, а инвеститори како Марк Андрисен и Бен Хоровиц по 2,5 милиони долари секој. Близнаците Винклвос донираа по 1 милион долари.

Криптоиндустријата потроши 135 милиони долари за поддршка на прокрипто кандидати за Конгресот – повеќето од нив победија на изборите.

Поддршката продолжи и по враќањето на Трамп на власт. Во август, близнаците Винклвос донираа 21 милион долари во биткоин за финансирање на неговата криптоагенда.

Во кои криптопроекти е вклучено семејството Трамп?

Трамп и членови од неговото семејство се поврзани со ВЛФ (World Liberty Financial), проект што издаде свој стабилен коин (USD1) и токен WLFI, вреден 4,5 милијарди долари. Семејството поседува 22,5 милијарди токени WLFI – нетргувани, но со номинална вредност од околу 4 милијарди долари.

Исто така се поврзани со АБ (American Bitcoin) – рударски проект, АЛТ5 (ALT5 Sigma) – криптотрезор и крипто ETФ-ови. Трамп дури и промовираше сопствен мемекоин ($TRUMP) непосредно пред да стане претседател.

Какво е досегашното влијание на Трамп врз криптото?

Неговата агенда за поддршка на криптовалутите ги охрабри институциите да ги прифатат дигиталните токени.

Трамп дозволи вклучување на криптото во 401(k) пензиските планови. До септември, околу 19 милијарди долари биле инвестирани во американски биткоин ETФ-ови.

Под Бaјден, Комисијата за хартии од вредност (SEC) беше ригорозна кон криптокомпаниите. Под Трамп, многу постапки се повлечени. Новиот претседател на SEC, Пол Аткинс, е отворен поддржувач на криптото, а институциите сега соработуваат со индустријата на нова регулаторна рамка.

Како уште Трамп ја поддржува криптоиндустријата?

Трамп го назначи инвеститорот Дејвид Сакс за „цар на ВИ и криптото“. Владата, наместо да ги продава запленетите биткоини, сега ги чува како дел од стратешка биткоин-резерва.

Тој го потпиша актот Џиниус (Genius Act), закон што промовира употреба на стабилни коини за секојдневни плаќања, а Министерството за трговија почна да објавува податоци на јавни блокчејни.

Следен чекор е актот Кларити (Clarity Act), закон што треба да го појасни статусот на дигиталните средства и да ја намали регулаторната несигурност околу криптовалутите што не се биткоин или етер. Тоа би ѝ дало поголема улога на Комисијата за тргување со стоковни фјучерси (CFTC) во регулацијата.

Се разгледува и идејата за законска крипторезерва, поддржана од сенаторката Синтија Лумис од Вајоминг.

Во моментов нема коментари за веста. Биди прв да коментира...

Остави коментар