Што треба да се случи за биткоинот да достигне милион долари

Изворната криптовалута биткоин веќе достигнуваше цени што многу скептици ги сметаа за невозможни. Минатата недела достигна нов рекорд, искачувајќи се речиси до 125.000 долари, па зошто тогаш да не се постави и прашањето: Може ли највредната дигитална валута да стигне до милион долари?

Водечката криптовалута повторно е во фокусот на инвеститорите, додека пошироките, традиционални пазари се борат со геополитички притисоци и загриженост дека вредноста на технолошките компании е пренадувана. Напнатоста деновиве дополнително ја зголемува и очекуваниот говор на претседателот на Федералните резерви (Фед), Џером Пауел, в петок. Како што пренесе „Блумберг Адрија“ во средата, светските берзи застанаа по рекордниот раст, ненадејната распродажба на акции од технолошките гиганти ги повлече пазарите надолу, а фјучерсите најавија дополнителни загуби.

Во исто време, биткоинот се движеше околу 114.000 долари, бележејќи дневен пад од приближно еден отсто, при што од почетокот на годината неговата вредност порасна за 20 отсто. Досегашниот ефект во 2025 година се надоврзува на растот од дури 115 отсто што биткоинот го оствари во 2024 година, поттикнат пред сè од прилив на средства од големи институционални инвеститори, откако во САД им беше дозволено да инвестираат во биткоин преку ETF (англ. exchange-traded fund – фонд со кој се тргува на берза).

Веќе подолго време криптоентузијастите шпекулираат како и кога биткоинот би можел да достигне цена од милион долари. Андре Драгошч од компанијата за управување со средства БАМ (Bitwise Asset Management) изнесе прогноза според која тоа би можело да се случи до 2029 година. Познатата американска инвеститорка Кети Вуд во претходна изјава за „Си-ен-би-си“ (CNBC) рече дека не ја исклучуваат можноста биткоинот да достигне 1,5 милион долари до 2030 година.

Претседателот на „Мајкростратеџи“ (MicroStrategy), Мајкл Сејлор, на конференцијата во Прага (BTC Prague 2025) изјави дека биткоинот се движи кон вредност од 21 милион долари до 2046 година. Треба да се нагласи дека бројот 21 има важно симболично значење во криптоекосистемот, бидејќи вкупниот број биткоини што некогаш може да се создадат (преку процесот наречен рударење) е ограничен на 21 милион – едно од основните правила запишани во кодот на биткоинот. Инаку, над 90 отсто од можните биткоини веќе се изрударени.

Слични, амбициозни најави има во изобилство – како и такви што предвидуваат крах на дигиталните средства. Да потсетиме дека со текот на времето се појавија сајтови што евидентираат колку пати релевантни медиуми и влијателни личности тврделе дека биткоинот пропаднал или наскоро ќе пропадне. Како што веќе пишуваше „Блумберг Адрија“, според тие апокалиптични сценарија, биткоинот досега „умрел“ речиси 500 пати.

Што е потребно за да се достигне прагот од милион долари?

Криптоаналитичарот и коосновач на ЦТБ (CTB Crypto & Consulting), Иван Андрејевиќ, наведува дека биткоинот навистина би можел еден ден да вреди милион долари – пред сè поради веќе спомнатата ограниченост на понудата на 21 милион токени што можат да се изрударат. Тоа, секако, не е единствениот фактор.

Bloomberg

Неизоставен аспект во оваа приказна е степенот на усвојување на биткоинот, односно неговото влегување во мејнстримот, во главните финансиски текови. „Во моментов сведочиме само на почеток на усвојувањето на биткоинот од страна на влади, фондови, компании и други важни институции“, вели Андрејевиќ. Заклучно со 2024 година, аналитичката платформа „Трипл еј“ (Triple-A) проценува дека просечната стапка на поседување криптовалути на глобално ниво изнесува 6,8 отсто, со над 560 милиони корисници на крипто низ светот.

Исто така, за да се достигне толку висока цена, потребна е многу поголема пазарна капитализација. „Со други зборови, треба да го надмине златото по пазарна капитализација“, наведува соговорникот. При цена од милион долари за еден биткоин, вкупната пазарна капитализација на криптовалутата би изнесувала околу 20 трилиони долари, се наведува во неодамнешен извештај на „Криптослејт“ (CryptoSlate), при што се додава дека податоците од сајтот КМК (Companiesmarketcap) покажуваат дека пазарната капитализација на златото во моментов ја надминува таа бројка, додека капитализацијата на биткоинот е приближно 10 пати помала.

Андрејевиќ како уште еден од потенцијалните двигатели ја посочува и значително повисоката инфлација.

„И со тековната инфлација е можно да се достигне прагот од милион долари, но тогаш веројатно зборуваме за период од, да речеме, дваесетина години. Реално гледано, не станува збор за тоа дека цената на биткоинот постојано расте, туку за скок е потребно, меѓу другото, вредноста на фиат-валутите значително да опадне“, вели Андрејевиќ. До остварување на горенаведените проекции за цена од милион долари до 2030 година можеби би можело да дојде во случај на појава на некаков екстремен катализатор, како поширока банкарска криза и слично“, смета тој.

Надворешните фактори, нагласува стручњакот, секако би требало да покажат поголемо влијание врз вредноста на биткоинот отколку промените што се случуваат во самиот екосистем, како што е преполовувањето (англ. halving).

„Секое преполовување во иднина може да носи сè помал и помал ефект. Во суштина, биткоинот влезе во некоја стабилна фаза во која учествуваат големи фондови, банки и држави, а ним не им одговара нестабилност. Она што луѓето претежно го забораваат е дека преполовувањата имаа големо влијание во самите почетоци на биткоинот, а секое преполовување е двојно помало од претходното и неговото влијание со време станува симболично“, вели Андрејевиќ.

Биткоинот останува главен на криптопазарот

Според мислењето на Андрејевиќ, биткоинот долгорочно останува главен играч на криптопазарот, односно дигитално злато, и покрај повремените отскокнувања на одредени видови дигитални средства, како етерот или стабилните криптовалути (stablecoins).

Во таа насока, од „Голдман Сакс“ (Goldman Sachs) неодамна објавија извештај во кој велат дека веруваат дека стабилните коини имаат потенцијал да ги преобликуваат индустриите и инвестициското опкружување. „Перспективата за воведување јасни регулативи во САД, со поддршка од претседателот Доналд Трамп и министерот за финансии Скот Бесент, би можела да го зацврсти легитимитетот на стабилните коини. Глобално, регулаторите сè повеќе обрнуваат внимание на законодавството што се однесува на стабилните криптовалути, вклучувајќи прашања за транспарентност на резервите, ревизорски стандарди и лиценци за издавачи. Технолошкиот напредок, како побрзи и поефикасни блокчејн-технологии, исто така придонесува за забрзано усвојување на стабилните криптовалути.“

Bloomberg

Бесент, инаку, верува дека стабилните коини ќе го зајакнат пазарот на американски државни обврзници и дека владата ќе продава повеќе краткорочен долг за да ја задоволи таа побарувачка, пренесе „Фајненшел тајмс“ (Financial Times).

„Треба да се имаат предвид веќе споменатите стапки на усвојување, најавите на Трамп за субвенции за други криптовалути, како и фактот што неодамна имавме денови кога беше речиси изедначено вложувањето во берзански фондови на биткоин и етер... За мене, етерот во овој контекст е значително попривлечен поради неговата употребна вредност, стабилните криптовалути што функционираат на етереум блокчејнот, како и пасивниот приход што го носи етерот. Мислам дека етер ќе ја поттикне адаптацијата кај пошироките маси, а биткоинот, како дигитално злато, останува без конкуренција“, објаснува Андрејевиќ.

Но дали на патот на биткоинот кон потенцијални милион долари некоја улога (освен економските) можат да имаат и технолошките аспекти?

Како што напредува развојот на квантното пресметување така повеќе се зборува за можни квантни напади што би претставувале закана за биткоинот. „Веќе се работи на заштита во тој поглед, а од друга страна треба да бидеме реални: ако дојде до такви напади, квантните компјутери многу полесно ќе ја пробијат традиционалната финансиска индустрија. Тука најголеми губитници би биле банките, државите, брокерите и слично, па, така, и во тој случај биткоинот би бил посигурна опција. Секако, и тој може да биде загрозен, како и сè друго, но тоа би било занемарливо во споредба со традиционалните финансии, особено со овие стапки на усвојување“, заклучува Андрејевиќ.

 

Оградување од одговорност: Сите информации се од општ карактер и не претставуваат инвестициски совети

Во моментов нема коментари за веста. Биди прв да коментира...

Остави коментар