Што ќе се случува со цената на златото и на биткоинот

Биткоинот и златото често се третираат како чувари на вредноста. Биткоинот претставува ново дигитално средство, старо само околу 15 години, додека златото се користи и чува со векови.

Годинава златото и биткоинот зајакнаа приближно за 25 отсто. Моментално златото се тргува по цена од 3.350 долари за унца (31,15 грам), што е нешто повеќе од четири отсто под рекордната цена од 3.500 долари за унца, достигната во април годинава.

И биткоинот се движи нешто под својот рекорд – моментално се тргува по околу 115.000 долари, што е осум илјади долари или 6,5 отсто под рекордот од 123.000 долари, достигнат кон средината на јули годинава.

Неизвесноста ја поттикнува цената на златото

Според мислењето на стручњаците, овие вредности би можеле значително да се променат. Според пишувањата на „Блумберг“, банката „Ситигруп“ (Citigroup) неделава објави ревидирани прогнози за движењето на цената на златото. Моментално прогнозираат дека растот ќе продолжи во блиска иднина, па дури и ќе ја надмине рекордната вредност – односно дека цената на златото во наредните три месеци ќе се движи помеѓу 3.300 и 3.600 долари за унца (во јуни прогнозираа консолидација од 3.100 до 3.500 долари). Аналитичарите објаснуваат дека за растот ќе придонесат американските увозни царини, кои во просек ги надминале очекуваните 15 отсто.

Да потсетиме, „Сити“ во една од претходните прогнози изрази очекување дека цената на златото во наредните квартали би можела повторно да падне под три илјади долари за унца. „Нашите истражувања покажуваат дека цената на златото до втората половина на 2026 година ќе се врати на ниво меѓу 2.500 и 2.700 долари за унца“, оценија тогаш аналитичарите. Кога станува збор за цената на златото во 2026 година, овој пат нагласуваат дека треба да се биде внимателен.

Во една од најголемите инвестициски компании, „Фиделити“ (Fidelity International), се пооптимистични кога станува збор за златото. Нивната процена е дека до крајот на следната година златото би можело да достигне цена од четири илјади долари за унца, бидејќи американската централна банка ќе мора да ги намали каматните стапки за да ги надмине економските предизвици, доларот ќе ослабне, а централните банки ќе продолжат да купуваат злато.

Аналитичарите на „Голдман Сакс“ (Goldman Sachs) очекуваат дека цената на златото до крајот на годинава ќе достигне 3.700 долари за унца, а до средината на 2026 година – 4.000 долари. Во УБС (UBS) прогнозираат дека цената на златото до декември 2025 година ќе порасне на 3.500 долари за унца.

„Иако биткоинот е блиску до своите историски рекорди, сè уште не го имал последниот збор“.
Ова го изјави аналитичарот на „Илирика“ (Ilirika), Домен Крегар.

„Враќањето на Доналд Трамп донесе нов бран закани со царини и политички потреси. Овие прогнози ја зголемија неизвесноста на светските пазари и предизвикаа зголемена побарувачка за злато, што дополнително ја зголеми неговата цена и ја поттикна нестабилноста на финансиските пазари“, пишуваат аналитичарите на „Блумберг Адрија“ (Bloomberg Adria) во својата последна анализа.

Сценарио: Биткоинот до 200.000 долари

И прогнозите за биткоинот најчесто укажуваат на раст. „Иако биткоинот во моментов е блиску до своите највисоки историски вредности, изгледа дека сè уште не го кажал последниот збор“, коментираше Крeгар за „Блумберг Адрија“.

Во екстремно сценарио, вредноста на биткоинот би можела да ја надмине границата од 200.000 долари до крајот на годината, изјави во јуни Ненад Неранджиќ од „Криптоброкер клуб“ за „Блумберг Адрија“.

Ако се остварат предвидувањата дека цената на биткоинот ќе достигне 200.000 долари до крајот на годината, а златото 4.000 долари за унца, тогаш вредноста на еден биткоин ќе се изедначи со вредноста на 1,5 килограм злато.

Слична процена дадоа и во меѓународната банка „Стандард чартерд“ (Standard Chartered). „Претпоставуваме дека растот ќе продолжи во текот на целото лето, што ќе ја приближи цената на биткоинот до нашата прогноза од 200.000 долари до крајот на годината“, им порача на инвеститорите Џефри Кендрик, шеф на одделот за дигитални средства во банката, пренесува „Си-ен-би-си“ (CNBC).

Во ноември 2021 година, кога биткоинот достигна рекордна вредност во претходниот циклус на раст, неговата вредност ја надмина границата од 68.000 долари, додека златото се тргуваше за околу 1.860 долари за унца (31,15 грам). Во тој момент вредноста на еден биткоин била еднаква приближно на 1,1 килограм злато.

Потоа, до крајот на 2022 година, цената на биткоинот драматично падна на 17.000 долари, додека златото – кое е многу помалку волатилно – значително подобро ја задржа својата вредност. Најниската вредност во последните пет години златото ја достигна во октомври 2023 година, кога се тргуваше за околу 1.650 долари за унца.

До крајот на 2022 година вредноста на биткоинот во однос на златото се намали за повеќе од 70 отсто – од 1,1 килограм злато за биткоин на 0,3 килограми злато за биткоин. Од 2023 година цената и на златото и на биткоинот бележи силен раст. Цената на биткоинот се зголеми 6,5 пати, додека цената на златото се удвои. Моментално вредноста на биткоинот повторно ја надминува вредноста на еден килограм злато – односот е околу 1,1 килограм злато за биткоин.

Ако се остварат горенаведените прогнози и цената на биткоинот до крајот на годината достигне 200.000 долари, а златото 4.000 долари за унца – биткоинот ќе вреди колку 1,5 килограм злато.