Златото до 4.000 долари за унца до крајот на 2026 година, според „Фиделити“

Златото би можело да достигне 4.000 долари за унца до крајот на следната година, како што Федералните резерви ги намалуваат каматните стапки за да ја поддржат американската економија, доларот паѓа, а централните банки низ светот продолжуваат да купуваат злато, сметаат во „Фиделити интернешнл“ (Fidelity International).

Портфолио-менаџерот во „Фиделити“, Иан Самсон, вели дека инвестициската фирма останува оптимист за скапоцениот метал, при што некои портфолија со вкрстени средства неодамна ги зголемија купувањата на злато, бидејќи цените се намалија од рекордниот максимум над 3.500 долари за унца во април.

„Образложението за тоа беше дека видовме појасен пат кон полабави Федерални резерви“, рече Самсон во интервју, додавајќи дека некои фондови дури ја удвоиле својата алокација од 5 отсто во текот на изминатата година. Исто така, август често е малку послаб за пазарите, па затоа поголемата диверзификација „има смисла“, рече тој.

Bloomberg Mercury

 

Златото порасна за повеќе од 25 отсто годинава, бидејќи неизвесноста околу агресивните обиди на претседателот Доналд Трамп да ја преобликува глобалната трговија, конфликтите на Блискиот Исток и во Украина и акумулацијата во централните банки ги поткрепија добивките. Сепак, металот се тргуваше во тесен опсег во последните неколку месеци, при што побарувачката за безбедно прибежиште малку се намали, бидејќи одреден напредок во трговските разговори со САД ги намали стравувањата за најлошите сценарија за глобалната економија.

„Можеби ќе ги избегнете сценаријата за судниот ден што беа разгледувани претходно годинава, но на крајот стигнуваме до  давачки од 15 отсто и сл.  на околу 11 отсто од американската економија - што е увоз“, рече Самсон, осврнувајќи се на царините на Трамп. „Би очекувале дека тоа ќе ја забави економијата“.

Прогнозите на „Фиделити“ за златото се слични на оние од „Голдман Сакс“, кои во последните квартали зборуваа за евентуален раст до 4.000 долари за унца. Сепак, други се претпазливи, вклучувајќи ја и „Ситигруп“, која прогнозира пониски цени. Спот-цената на златото последен пат беше близу 3.315 долари.

Претставниците на Федералните резерви треба да се соберат неделава за да ја утврдат политиката за понатаму. Иако не се очекува никаква промена, претседателот Џером Пауел може да се соочи со несогласувања од колеги во Фед што сакаат да обезбедат поддршка на пазарот на трудот, кој забавува, потенцијално од гувернерот Кристофер Волер и потпретседателката за супервизија Мишел Боуман.

Забавувањето на американската економија веројатно би довело до тоа таборот што се залага за полабава монетарна политика да има поголемо влијание на Фед, при што доларот има тенденција да ослаби во услови на послаб раст, рече Самсон. Покрај тоа, Пауел - чиј мандат како претседател на Фед завршува следниот мај - веројатно ќе биде заменет со некој „попријателски“ расположен кон пониски каматни стапки, бидејќи Трамп продолжува да лобира за нивно намалување, рече тој.

Златните прачки што не носат принос обично влечат корист кога доларот ослабнува и каматните стапки се намалуваат.

На други места низ светот, централните банки веројатно ќе продолжат да купуваат злато, додаде тој, додека растечките фискални дефицити - особено во САД - ќе продолжат да ја зајакнуваат привлечноста на скапоцениот метал како цврста актива.

„Секако, златото помина долг пат, но ако погледнете кога златото било среде биковски пазар - како од 2001 до 2011 година - годишната стапка на раст била 20 отсто“, рече тој. „Од 2021 година до денес исто така растот е 20 отсто годишно. Значи, не е нужно, во контекст на биковски пазар, дека е премногу „растегнато“.

Во моментов нема коментари за веста. Биди прв да коментира...

Остави коментар