Зад потезите на Бесент, Волстрит гледа знаци на загриженост на пазарот на обврзници

Трговците и стратезите на Волстрит велат дека американскиот секретар за финансии Скот Бесент испраќа нови сигнали дека сака да спречи нагло зголемување на приносите на обврзниците.

Во текот на една недела, тој презеде чекори за кои тие сметаат дека имаат цел да го намалат притисокот врз пазарот на американски државни обврзници, откако долгорочните каматни стапки се искачија на највисоко ниво во последните 19 години, зголемувајќи ги трошоците за сите, од купувачите на домови до голем дел од корпоративна Америка.

Прво, тој ја спроведе првата американска валутна интервенција за поддршка на јенот од 1998 година, намалувајќи го ризикот Јапонија да почне да продава американски државни обврзници за да ги обезбеди доларите потребни самата да купува јени. Тој, исто така, посочи на инструмент на Федералните резерви што Токио би можел да го користи во иднина.

Потоа, при минатонеделната објава за кварталната продажба на обврзници, суптилната и неочекувана промена во насоките на неговото министерство беше протолкувана како отворање на вратата за можно намалување на продажбата на долгорочни обврзници.

Бесент, исто така, настапува во медиумите и на социјалните мрежи за да ја брани новата комуникациска стратегија на претседателот на Федералните резерви, Кевин Ворш, кој предизвика скок на приносите по минатомесечниот состанок, кога не објасни како или кога централната банка би можела да дејствува за да ја намали инфлацијата.

Овие потези укажуваат дека Бесент се обидува да направи сè што е во негова моќ за да го запре растот на долгорочните каматни стапки на обврзниците, кои се зголемија поради упорната инфлација и годишните буџетски дефицити од речиси два билиона долари, што резултираат со постојано зголемување на понудата на нов долг.

„Фед и Министерството за финансии сигурно стануваат загрижени поради нивото на долгорочните каматни стапки“, рече Прија Мисра, портфолио-менаџер во „ЏП Морган“ (JPMorgan Asset Management). „Интервенцијата со Јапонија, поддршката за Ворш и можното намалување на понудата на долгорочни обврзници може да бидат обиди на Министерството за финансии да сигнализира дека е свесно за движењата на пазарот на каматни стапки и дека нема да се двоуми да ги употреби различните инструменти што му се на располагање.“

Приносите се блиску до највисокото ниво во вториот мандат на Трамп

Референтните трошоци за задолжување се зголемија годинава поради војната со Иран

Bloomberg

На крајот, влијанието на Бесент е ограничено, со оглед на поголемите сили што дејствуваат. Во петокот, приносите на американските државни обврзници се намалија откако извештајот на Министерството за труд покажа значително слабеење на пазарот на трудот, што е знак дека економијата забавува. Помал од очекуваниот раст на индексот на потрошувачките цени во среда би можел дополнително да го зајакне ова движење на пазарот.

Сепак, потезите на Министерството за финансии беа протолкувани како знак дека е подготвено да направи сè што може за да ги намали трошоците за задолжување, што претседателот Доналд Трамп повеќепати го посочи како приоритет. Портпаролите на Министерството за финансии не одговорија на барањето за коментар.

На почетокот на минатата година, по враќањето на Трамп во Белата куќа, Бесент рече дека главниот фокус на администрацијата е намалувањето на приносите на десетгодишните обврзници, кои служат како основа за хипотекарните и другите видови кредити. Тој рече дека нејзините фискални политики ќе помогнат да се постигне таа цел преку намалување на државната потрошувачка, што би придонело за ублажување на инфлацијата.

Во ноември, нарекувајќи ја својата работа „главен продавач на обврзници на земјата“, Бесент, поранешен менаџер на хеџ-фонд, рече дека приносите на државните обврзници се „силен барометар за мерење на успехот“.

Но, намалувањата на потрошувачката на администрацијата имаа мало влијание, а нејзините даночни намалувања значително ќе го зголемат државниот долг во текот на следната деценија. Нападите на Трамп врз Фед, кој минатата недела повторно се закани дека ќе ја отпушти гувернерката Лиса Кук, ги загрижија инвеститорите бидејќи ја доведуваат во опасност независноста на централната банка. А скокот на цената на нафтата поради војната со Иран создаде нов инфлациски шок, кој придонесе приносот на десетгодишните обврзници да се искачи на околу 4,65 отсто, повисоко отколку на почетокот на вториот мандат на Трамп.

„Со политиката на потрошувачка што е усвоена и со војната, ќе биде тешко да се намали притисокот врз долгорочниот сегмент на пазарот“, рече Џон Велис, американски макростратег во „БНИ“ (BNY).

Одлуката на Бесент да купува јени навидум беше насочена кон помош на сојузник. Но, таа би можела да го намали притисокот врз јапонскиот пазар на обврзници, каде што растот на приносите во последно време придонесе за распродажбата на американските државни обврзници, како и да ја намали потребата на Јапонија да продава американски обврзници за да ги обезбеди доларите потребни за одбрана на сопствената валута.

Тој, исто така, се заложи за зголемување на капацитетот на репо-инструментот на Фед за странски и меѓународни монетарни власти (Foreign and International Monetary Authorities Repo Facility), кој им овозможува на странските централни банки да позајмуваат долари користејќи ги своите американски државни обврзници како обезбедување.

„Очигледно стигнавме до точка на таква кревкост на американскиот пазар на државни обврзници поради растот на долгорочните каматни стапки, што ги охрабруваме странските сопственици да не продаваат“, рече Питер Буквар, главен инвестициски директор во „Уанпоинт БФГ“ (Onepoint Bfg).

Неколку дена по интервенцијата на девизниот пазар, претставниците на Министерството за финансии направија неочекувана промена во насоките за пазарот на обврзници во кварталното соопштение за рефинансирање, кое се користи за поставување на очекувањата за обемот на претстојните продажби на државен долг.

Наместо да кажат дека продолжуваат да ги разгледуваат можните идни „зголемувања“ на продажбата на обврзници со купон и обврзници со променлива каматна стапка, како што беше случај претходно, тие овојпат рекоа дека разгледуваат можни „промени“.

Инвеститорите во обврзници тоа го протолкуваа како сигнал за можноста Министерството да ја намали продажбата на долгорочните обврзници што се под најголем притисок. Околу 61 отсто од клиентите анкетирани од „БМО“ (BMO Capital Markets) сега очекуваат следната промена во обемот на аукциите на 30-годишни обврзници да биде намалување, наместо зголемување.

Сепак, ваквите промени во рочноста, доколку навистина се случат, можат да имаат само ограничен ефект. Повеќе од сè, ќе бидат потребни докази дека инфлацијата повторно е ставена под контрола, по пет години во кои ја надминуваше целта на Фед од два отсто, за сопствениците на обврзници да бидат убедени да позајмуваат по пониски каматни стапки.

Bloomberg

Откако коментарите на Ворш по состанокот предизвикаа распродажба на обврзници, доведувајќи го во прашање неговиот кредибилитет во борбата против инфлацијата, Бесент застана во одбрана на новиот претседател на Фед. За време на гостувањето на Си-ен-би-си (CNBC) минатата недела, тој рече дека на пазарите им е потребна „детоксикација“ од коментарите на Фед и дека е уверен оти Фед „ќе воспостави рамнотежа меѓу својот мандат за раст и својот мандат за инфлација“.

Фиби Вајт, раководителка на стратегијата за американските каматни стапки во „УБС “ (UBS Group), рече дека неодамнешните чекори на Министерството за финансии можеби ќе имаат само ограничено влијание.

Но, како што рече таа, тоа покажува дека „ако Министерството за финансии може да направи нешто за да спречи натамошен раст на долгорочните приноси, ќе ги искористи инструментите што му се на располагање“.

-Со помош на Даниел Флетли