Глобалната распродажба на обврзници се засилува, пазарите очекуваат ново покачување на каматите

Глобалната распродажба на обврзници се засили и ги потресе инвеститорите. Силните економски податоци од САД и слабата побарувачка на аукција на државни обврзници ги кренаа приносите на американските обврзници со различни рокови на доспевање на највисоките нивоа во речиси две децении.

Големите загуби од Волстрит се прелеаја во Азиско-пацифичкиот Регион. Обврзниците поевтинија во Јапонија, Австралија, Нов Зеланд, како и на пазарите во развој. Приносот на десетгодишните американски обврзници се стабилизира на 5,12 отсто во азиското тргување, по скокот од 15 базични поени во средата – најголем од превирањата предизвикани од објавата на претседателот Доналд Трамп за царините во април 2025 година.

Слабата побарувачка на аукцијата на петгодишни американски обврзници го крена нивниот принос над пет отсто, првпат од 2007 година. Показателот на „Блумберг“ за доларот се задржа близу нивоата последен пат забележани во јули, додека трговците ги зголемуваа очекувањата за нови покачувања на каматните стапки од страна на Федералните резерви.

Нафтата „Брент“ ги надомести загубите од претходниот дел од тргувањето и се тргуваше речиси без промена, околу 103 долари за барел. Азиските акции го следеа падот на берзанските индекси на Волстрит и се намалија за 0,6 отсто, а фјучерсите на берзанските индекси укажуваа дека загубите би можеле да се прошират и во Европа.

Bloomberg

Можноста за повисоки трошоци за енергија, во услови кога американската економија и натаму е силна, создава дополнителен притисок врз пазарот на обврзници, кој веќе е потресен од слабата побарувачка на аукциите и од загриженоста дека каматните стапки ќе останат високи. Приносите на американските државни обврзници нагло пораснаа, а просечниот принос на државните обврзници во светот се приближи до четири отсто. По првото покачување на каматите од 2023 година, спроведено минатата недела, трговците ги зголемија очекувањата за натамошно заострување на монетарната политика од Фед.

„Пазарот ни кажува дека влеговме во вистински циклус на повторно заострување“, рече Тони Мијано од Инвестицискиот институт на „Велс Фарго“ (Wells Fargo Investment Institute). „Приносите на обврзниците со сите рокови на доспевање се приспособуваат истовремено. Тоа значи повисоки дисконтни стапки за акциите, повисоки трошоци за станбени и корпоративни кредити и повисок праг за ризичните средства.“

Каматните свопови сега целосно одразуваат три покачувања на каматите од по 0,25 процентни поени во следната година, а има и значително заштитување од можноста за четврто покачување. Ако се остварат, тие би ја довеле целната каматна стапка на централната банка во распон од 4,75 до пет отсто.

Што велат стратезите на „Блумберг“...

„Задоцнетата реакција на јапонските државни обврзници на покачувањето на каматите од Банката на Јапонија јасно се гледа во распродажбата во четвртокот. Инвеститорите во обврзници се вратија од одмор, а на нивната загриженост дека Банката на Јапонија сè уште доцни со доведувањето на каматите до неутрално ниво сега се надоврза и падот на американските државни обврзници.“

- Марк Кренфилд, стратег на „Маркетс лајв“. 

Претставниците на Фед минатата недела ги покачија каматните стапки на распон од 3,75 до четири отсто. Претседателот на Фед, Кевин Ворш, рече дека со тој потег е отстранета „доза на олеснување“. Гувернерот на Фед, Мајкл Бар, изјави дека веројатно ќе бидат потребни дополнителни покачувања на каматите за инфлацијата да се врати на целта на централната банка од два отсто.

На другите пазари, златото поевтини за 0,2 отсто и се тргуваше околу 4.280 долари за унца. Привлечноста на златото, кое не носи камата, се намалува кога каматните стапки растат.

Акциите во континентална Кина паднаа за 1,5 отсто, иако американскиот министер за финансии Скот Бесент објави дека САД и Кина договориле двомесечно продолжување на трговското примирје. Претседателот Шји Џјинпинг пристигна во Америка во својата прва државна посета по 11 години.

Некои аналитичари оценија дека договорот на САД и Кина за продолжување на трговското примирје до 10 јануари отстранил непосреден извор на неизвесност, но дека е потребен суштински напредок за да се отстрани и преостанатиот притисок врз пазарите.

Фјучерсите на дизелот во САД нагло поскапеа додека администрацијата на Трамп работеше со рафинериите на доброволно ограничување на извозот на овој производ, како алтернатива на целосна забрана за испораки во странство.

Во Јапонија, приносот на десетгодишните државни обврзници во четвртокот порасна за 10 базични поени, на 3,075 отсто – највисоко ниво од 1996 година. Приносот на соодветните австралиски обврзници го забележа најголемиот пораст во речиси две недели, а приносот на новозеландските обврзници со ист рок – најголемиот скок од почетокот на март.

Наглиот раст на приносите повторно ги стави во центарот на вниманието идните одлуки на Фед за каматните стапки.

Според средната вредност на прогнозите објавени по минатонеделната одлука, претставниците на Фед предвиделе уште едно покачување на каматите до крајот на годинава. Средната прогноза за 2027 година не предвидува дополнителни покачувања следната година, иако осум претставници очекуваат референтната каматна стапка на крајот на 2027 година да биде за половина процентен поен повисока од сегашното ниво.

„По состаноците за монетарната политика се доби впечаток дека приносите на обврзниците би можеле да се стабилизираат, па последниот раст делува прилично брз“, рече Икуо Мицуи, менаџер на фонд во „Аизава секјуритис“ (Aizawa Securities Co.). „Сепак, приносите достигнуваат прилично привлечни нивоа и инвеститорите во обврзници сега можеби ќе почнат да бараат можности за вложување.“