Најголемиот сопственик на франшизата на ИКЕА (IKEA) купува шумско земјиште во Латвија и Естонија во вредност од 720 милиони евра. Станува збор за најголема ваква аквизиција, чија цел е да обезбеди добро управуван извор на одржлива суровина за својот мебел.
Според соопштението што е објавено денеска, „Ингка инвестментс“ (Ingka Investments), инвестициската гранка на „Ингка груп“ (Ingka Group), купува околу 153.000 хектари земјиште од шведското здружение на сопственици на шуми „Содра“ (Sodra). Нешто помалку од 90 проценти од површината е покриена со шуми. Од „Ингка“ изјавија дека купувањето е во согласност со долгорочната корпоративна стратегија за одржливо инвестирање и зајакнување на локалните вредносни синџири.
„Компанијата се стреми да заземе ‘генерациски поглед’ како на управувањето со шумите, така и на снабдувањето со обновливи материјали за ИКЕА“, изјави извршниот директор Петер ван дер Пол. Планот е да се соработува со балтичките пилани и производители на дрвни панели за регионална обработка на дрвото.
Групацијата „Ингка“, која управува со продавниците на ИКЕА на 31 пазар и учествува со 87 проценти во глобалната малопродажба на ИКЕА, веќе управува со 331.000 хектари шумско земјиште во седум земји. Таа е во сопственост на добротворна фондација, која ги реинвестира профитите во бизнис и проекти за одржливост наместо да исплаќа дивиденди.
Со аквизицијата, неодамнешните инвестиции на „Ингка“ надминаа една милијарда евра. Компанијата неодамна ја купи логистичката платформа за вештачка интелигенција „Локус“ (Locus), водечки малопродажен и канцелариски објект во Менхетн, за втора продавница на ИКЕА, и малцински удел во „Вангуард рињујаблс“ (Vanguard Renewables), која го претвора отпадот од храна во обновлив природен гас.
Извршната директорка на „Содра“, Лота Лира, изјави дека продажбата ѝ овозможува на групацијата да се фокусира на зголемување на вредноста на шведските шуми на своите членови. Договорот чека одобрување од регулаторот.
.webp){kind=icon}
