ЕМА: Нема докази дека новите лекови за слабеење предизвикуваат рак

Европската агенција за лекови (ЕМА) не најде докази дека популарните нови лекови за слабеење и дијабетес предизвикуваат рак на тироидната жлезда, смирувајќи ги пациентите кои стравуваа од потенцијалниот несакан ефект на лековите.

Комитетот за безбедност на агенцијата (PRAC), ги прегледа објавените студии, како и податоците на производителите на лекови вклучувајќи ги и „Оземпик“ (Ozempic) и „Вегови“ (Wegovy) на „Ново Нордиск“. Комитетот соопшти дека производителите на лекови треба да продолжат внимателно да ги следат случаите на рак на тироидната жлезда и да известуваат за какви било нови докази.

Достапните докази не ја поддржуваат каузалната поврзаност помеѓу лековите и ракот на тироидната жлезда, се вели во денешното соопштение на агенцијата. ЕМА ја започна својата истрага откако една студија укажа на потенцијалот на зголемен ризик од рак на тироидната жлезда кога луѓето со дијабетес тип 2 ги користат лековите.

На американските етикети на „Оземпик“ и „Вегови“ има предупредување за тумори на тироидната жлезда кај глодарите, велејќи дека не е познато дали лековите предизвикуваат тумори кај луѓето. Издадените рецепти за двата лека се зголемија благодарение на нивната способност да им помогнат на луѓето да изгубат тежина.

Известувањето на EMA се однесува и на други лекови вучувајќи ги „Виктоза“ (Victoza),  „Саксенда“ (Saxenda), „Трулисити“ (Trulicity) и „Бидуреон“ (Bydureon) и „Бајета“ (Byetta).