Кина одобрила повеќе нови лекови против рак одошто САД

Кинеските здравствени власти одобриле повеќе нови лекови за третман на канцер од нивните американски колеги во последните неколку години, според студија објавена во понеделник, која покажува дека инвестициите во кинеската биотехнолошка индустрија ја зголемуваат нејзината конкурентност на глобално ниво.

Помеѓу 2020 и 2025 година, Националната администрација за медицински производи на Кина одобрила за продажба 94 нови лекови против рак во споредба со 87 одобрени од американската Администрација за храна и лекови (ФДА). Кина ја завршила 2025 година со речиси три пати повеќе одобренија за лекови против рак од САД, според студијата објавена во списанието „Здравствени работи“ (Health Affairs). Спроведена е од истражувачи од Универзитетот во Пенсилванија и групата за застапување „Пријатели на истражувањето на ракот“ (Friends of Cancer Research).

Податоците покажуваат дека ФДА одобрила повеќе лекови до 2022 година во текот на периодот на студијата, а тоа се сменило во 2023 година, при што Кина ги надминала САД до 2025 година.

 

Број на одобрени нови лекови за третман на рак во САД и Кина

Bloomberg Mercury, Health Affairs

 

Многу од онколошките лекови одобрени во Кина се нивни верзии на оние што се на пазарот веќе некое време во САД. САД сè уште доминираат кога станува збор за пласирање на нови класи на лекови на пазарот, покажуваат податоците.

Од 36 лекови во текот на временскиот период опфатен со студијата, а  коишто биле првите што се борат против клетките на ракот преку одредени патишта во телото, 30 беа одобрени прво во САД. ФДА ги разгледувала апликациите за нови лекови во просек за 117 дена побрзо од Националната администрација за медицински производи на Кина, се вели во студијата.

Сепак, одобренијата се доказ за еволуција во капацитетите на кинеската индустрија, која преминала од производство главно на генерички лекови од пред 15-тина години до развој и комерцијализација на иновативни лекови, вели Џеф Ален, претседател и извршен директор на „Пријатели на истражувањето на ракот“, со седиште во Вашингтон.

„Тоа покажува континуиран многу брз пресврт во инвестициите на Кина во биотехнолошката индустрија и успехот што го постигнуваат“, рече Ален, еден од авторите на студијата, во интервју.

Три од шесте т.н. „први во класата“ третмани (лекови со сосема нови механизми на дејствување, н.з.) одобрени во Кина беа од минатата година, иако тие главно се сметаат за нови поради таргетирање на две познати патишта на ракот во телото во еден лек, наместо во повеќе одделни третмани.

Сите три се од производители на лекови со седиште во Кина и Хонг Конг, вклучувајќи ги „Бибетер мед“ (BeBetter Med Inc.), „Лепу Биофарма“ (Lepu Biopharma Co.) и „Чиа Таи“  (Chia Tai Tianqing Pharmaceutical Group Co.), подружница на „Сино Биофармасеутикал“ (Sino Biopharmaceutical Ltd.).

Само 14 од лековите биле одобрени и во САД и во Кина во временскиот период на студијата. „Во Кина постои високо фокусирана домашна индустрија која не станала глобална“, вели Ален.

Како што ги пласираат лековите на пазарот во Кина, сè повеќе познати фармацевтски компании низ целиот свет се потпираат на кинеските фирми како важни партнери за развој.

Кина стратешки инвестираше во својот биофармацевтски сектор во текот на последната деценија за да го направи поконкурентен и партнер за фармацевтските компании низ целиот свет за спроведување истражувања во рана фаза и производство во завршна фаза, според извештај објавен во ноември од Комисијата за економски и безбедносен преглед на САД и Кина, комитет кој ги следи и го известува Конгресот за импликациите врз националната безбедност од трговијата на САД со Кина.

„Софистицираната лабораториска инфраструктура на Кина и растечката база на биотехнолошко производство ја позиционираат да стане лидер во комерцијализацијата на глобалните научни откритија“, се вели во извештајот.

 

-Со помош на Роберт Лангрет.