Хакерската банда која стои зад неодамнешниот напад врз најголемиот светски заемодавец по имот, банката ИЦБЦ (ICBC - Industrial & Commercial Bank of China Ltd.) ја презеде одговорноста за уште двe хакирања на американски финансиски фирми.
Бандата позната како „Локбит“ (Lockbit) неделава на својата листа на дарквеб како жртви ги додаде и „Чикаго трејдинг компани“ (Chicago Trading Company - CTC) и „Алфадајн“ (Alphadyne Asset Management). Бандата им дала рокови да извршат исплата на непрцизирани суми и се заканува дека јавно ќе ги објави украдените податоци доколку нејзините барања не бидат исполнети.
Претставник на „Алфадајн“, инвестициска фирма со седиште во Њујорк, чии клиенти вклучуваат пензиски фондови и осигурителни компании, одби да коментира. „Алфадајн“ работи како и обично, рече лице запознаено со ситуацијата, кое не е овластено да зборува јавно.
Прочитај повеќе
Најголемата банка во светот погодена од злогласна хакерска група
Банката ИЦБЦ најверојатно е хакирана од истата група што минатата недела го погоди и „Боинг“.
10.11.2023
Секторот за услуги на „Боинг“ погоден од сајбер-напад
Од компанијата „Боинг“ потврдија дека се занимаваат со инцидент со сајбер-безбедноста.
02.11.2023
Нападот врз „Чикаго трејдинг компани“, комерцијална трговска фирма, бил извршен на крајот на октомври, рече друго лице, кое исто така побара да остане анонимно. Засега не е јасно дали тој напад има директна врска со хакирањето на ИЦБЦ минатата недела, по кое најголемиот заемодавец во светот не можеше да ги расчисти тргувањата со американското Министерство за финансии.
„Чикаго трејдинг компани“ го истражува случајот со помош од органите за спроведување на законот и ја утврдува и ја зајакнува својата безбедност, според претставник на компанијата. „Операциите се безбедни и тргувањето не беше засегнато. Никогаш немаше никаков откуп“, рече портпаролот.
Руска врска
„Локбит“ во последната година стана најуспешната хакерска група за откуп во светот и нападна голем број жртви од висок профил, вклучително и британската пошта (Royal Mail), фирмата за финансиски софтвер ИОН (ION Group) и „Боинг“ (Boeing Co). Од 2020 година, бандата извршила повеќе од 1.700 напади и изнудила 91 милион долари, според американската Агенција за сајбер безбедност и безбедност на инфраструктурата.
Познато е дека бандата краде внатрешни податоци и ги шифрира компјутерите на своите жртви, правејќи ги неупотребливи. Потоа бара плаќање во замена за отклучување на компјутерите и необјавување на украдените податоци. Во некои случаи, групата ги изостава компјутерите и само врши изнуда на пари со закана дека ќе ги открие украдените податоци.
Лидерите на „Локбит“, за кои е познато дека зборуваат на руски, спаѓаат во мрежата на хакери кои вршат напади користејќи малициозен софтвер. Тие потоа ги делат приходите, велат експерти за сајбер безбедност.
„Чикаго трејдинг компани“ е основана во 1995 година. Со канцеларии во Чикаго, Лондон и Њујорк, фирмата активно тргува со акции, кредити и стоки.
„Алфадајн“ е основана во 2005 година од двајца партнери кои биле колеги во „ЏП Морган“ (JPMorgan Chase & Co). Со канцеларии во Њујорк, Лондон, Хонгконг и Токио, компанијата е активна на пазарите за фиксен приход, акции, кредити и стоки. Нејзините инвеститори вклучуваат пензиски фондови, осигурителни компании и државни фондови, е нагласено на официјалната веб-страница.
.webp){kind=icon}
Во моментов нема коментари за веста. Биди прв да коментира...