Секторот за услуги на „Боинг“ погоден од сајбер-напад

Од компанијата „Боинг“ (Boeing Co.) потврдија дека се занимаваат со инцидент со сајбер-безбедноста што влијаел на елементи на секторот за делови и дистрибуција управуван од одделот за глобални услуги на „Боинг“.

Безбедноста на летовите не е загрозена, порача „Боинг“ во соопштение испратено по е-пошта во средата, додавајќи: „Активно го истражуваме инцидентот и соработуваме со органите за спроведување на законот и регулаторните органи“.

Група сајбер напаѓачи поврзани со Русија, познати како Локбит (Lockbit), во објава на дарк веб минатата недела тврдеа дека ќе започат со објавување „чувствителни податоци“ доколку гигантот во областа на воздухопловството и одбраната не го исполни барањето за откуп до 2. ноември. Сепак, во средата навечер немаше споменување на „Боинг“ на веб-страницата на Локбит наменета за протекување на информации.  

„Кога организациите се отстранети од станиците за протекување, тоа често значи дека организацијата го платила откупот или се согласила да преговара“, рече Брет Калоу, аналитичар за закани во компанијата „Емсисофт“ (Emsisoft). „Првото е обично трајно, додека второто може да биде само привремено.

Портпаролката на Боинг одби да коментира дали американскиот производител на авиони го платил откупот. Компанијата тековно ги известува своите клиенти и добавувачи за сајбер-нападот.

Локбит е меѓу најозлогласените хакерски банди кои често користи софтвер за да ги заклучи датотеките на жртвите, а потоа бараат исплати за да ги отклучат. Во последно време, хакерските банди сè повеќе крадат документи и бараат откуп за да не ги објавуваат податоците.

Акциите на „Боинг“ беа малку променети во тргувањето по работното време.