text size
Паднаа цените на користените луксузни часовници од брендови како „Ролекс“ (Rolex), „Патек Филип“ (Patek Philippe) и „Одемар Пиге“ (Audemars Piguet). Падот на цените дојде откако американската централна банка ги зголеми каматните стапки за да го смири остриот пораст на инфлацијата, според индексот на „Сабдајл воч“ (Subdial Watch) на „Блумберг“.
Сега тој притисок може да се намали. Американската централна банка во средата сигнализираше дека најверојатно завршува со најголемиот циклус на зголемувања на каматните стапки.
Според претседателот на Фед, Џером Пауел, трошоците за задолжување би можеле да почнат да паѓаат следната година со очекуваното намалување на каматните стапки.
„Тоа може да предизвика пресврт во вреднувањето на половните часовници“, вели Кристи Дејвис, коосновач на „Сабдајл“ (Subdial), британски трговец на пазарот за половни часовници со платформа за тргување.
„Кога гледаме во перспектива за 2024 година, потенцијалот за стабилни, а во иднина и опаѓачки каматни стапки е причина за оптимизам на пазарот на часовници“, рече тој.
Индексот на „Блумберг“, кој ги следи цените за 50-те најтргувани модели на часовници по вредност на трансакцијата, падна за околу 10 отсто во 2023 година. Сега е на најниско ниво во повеќе од две години, по порастот што достигна врв на почетокот на 2022 година.
Во текот на пандемијата побарувачката за скапи половни часовници од врвни швајцарски брендови вртоглаво се зголеми бидејќи потрошувачите времето го минуваа дома, полни со кеш и купуваа луксузни часовници преку интернет. Ситуацијата се смири бидејќи трошоците за задолжување се зголемија.
„Цените на часовниците најмногу паднаа меѓу април и август 2022 година, кога Фед ги спроведе најголемите зголемувања на каматните стапки“, вели Кристи Дејвис.
Иако цените драстично паднаа, часовниците како „ролекс дејтона“ (Rolex Daytona), „патек филип наутилус“ (Patek Philippe Nautilus) и „одемар пиге ројал оук“ (Audemars Piguet Royal Oak) продолжуваат да се продаваат на секундарниот пазар многу над малопродажните цени.
.webp){kind=icon}
