Дали големите луксузни часовници веќе не се по вкус на купувачите?

„Панераи“ (Panerai) се издвојува меѓу брендовите на часовници на компанијата „Ришемон“ (Richemont) - но се чини од погрешни причини.

Додека пазарот на половни часовници бележи силно закрепнување, „Картие“ (Cartier) го привлекува вниманието на купувачите, а интересот повторно се буди и за „Вашерон Константин“ (Vacheron Constantin). Во тој контекст, слабиот интерес за „Панераи“ станува уште поочигледен.

Брендот со италијанско потекло, познат по големите и кабасти часовници инспирирани од моделите од периодот на Втората светска војна, станува исклучок на пазарот на половни часовници, со цени и обем на продажба што заостануваат зад конкурентските брендови во сопственост на компанијата „Ришемон“.

Ни новите модели на „Панераи“ не привлекуваат особено внимание | Michael Nagle/Bloomberg

„Панераи“ има убедливо најслаби резултати според обемот на тргување меѓу главните брендови на часовници на „Ришемон“ што ги следи „Сабдајл“ (Subdial), платформа за купување и продажба на часовници.

Секундарниот пазар на часовници годинава бележи најдобри резултати од 2022 година, според индексот Bloomberg Subdial Watch, а неколку бренда на „Ришемон“ забележаа значителен раст на активноста. Сепак, обемот на тргување со часовниците „панераи“ речиси не е променет во однос на почетокот на 2024 година.

„Тоа е навистина многу впечатлив исклучок и во одреден момент сигурно ќе стане проблем за ’Ришемон’“, изјави Александер Нусбахер, директор за податоци во лондонската компанија „Сабдајл“.

„Ришемон“ не одговори на барањето коментар за неговите планови за „Панераи“.

Според извештајот на компанијата „Евривоч“ (EveryWatch) за секундарниот пазар на часовници, пазарот на половни часовници во јули го забележа најголемиот полугодишен скок досега. Растот го предводеше силната побарувачка во САД, додека вкупната вредност на продадените часовници порасна за нешто повеќе од 37 проценти, на 10,5 милијарди долари.

Големите часовници со воена традиција не се во тренд | Bing Guan/Bloomberg

Часовник „панераи радиомир“ во излог на продавница | Bing Guan/Bloomberg

„Ришемон“ од падот на пазарот на луксузни часовници во последните години излезе во значително подобра позиција од конкуренцијата, а акциите на компанијата неодамна достигнаа рекордни вредности.

Продажбата во сегментот на специјализирани производители на часовници порасна за осум проценти во последниот деловен извештај на компанијата. Меѓу најдобрите резултати се истакнаа „Вашерон Константин“, „Жежер Лекотур“ и „Ланге и Соне“ (Lange & Söhne).

Швајцарската компанија неодамна почна да го преобликува својот бизнис со часовници, откако се согласи да го продаде „Бом и Мерсие“ (Baume & Mercier) на италијанската компанија „Дамијани“ (Damiani Group).

Сега проблемите со кои се соочува „Панераи“ го отвораат прашањето дали овој бренд сè уште се вклопува во портфолиото на компанијата „Ришемон“.