Пет важни вести за почеток на денот

Минатиот викенд го обележа нападот во Москва во која загинаа над 130 лица кои присуствувале на концерт. Вчера во земјата беше ден на жалост. Руските власти го вперија прстот кон Украина која отфрли вмешаност во нападот. Продолжија нападите и на Хутите во Црвеното море, овој пат беше нападнат кинески танкер натоварен со нафта.

ББА-анализа: Македонија ќе биде претпоследна во регионот по растот на БДП

Личната потрошувачка ќе го задржи нагорниот тренд, водејќи го растот на БДП во 2024 и 2025 година, што е во линија со закрепнувањето на извозот и подобрувањето на надворешната побарувачка, посочуваат од аналитичкиот тим на „Блумберг Адрија“ во новата анализа на макроекономските показатели на земјите во регионот објавена на „Блумберг Адрија инсајт“.

„Генерално, земјите од регионот Адрија покажаа отпорност за време на тековниот глобален рецесиски бран. И покрај тоа што надворешната побарувачка претставуваше пречка за поживописен раст, цврстите домашни фактори доминираа и го задржаа регионот на патеката на раст“, велат аналитичарите.

Вечни должници: парите се вртат, долговите си стојат

Заклучно со крајот на минатата година, долгот на буџетарите, општините, јавните претпријатија, здравствените установи изнесувал близу 409 милиони евра. Во однос на крајот на 2022 година, обврските се намалиле за 11 милиони евра и ова е прво нивно намалување по пандемската 2020 година.

Од податоците на Министерството за финансии се гледа дека најголеми должници во земјава се јавните претпријатија и акционерски друштва во државна сопственост. Над 167 милиони евра се нивните обврски. Следни се општинските јавни претпријатија, па општините и здравствените установи.

Емисиите на ЦО2 нов товар за секторот недвижности

Инвеститорите во недвижности веќе погодени од високите каматни стапки сега се соочуваат со можност за значителни трошоци поттикнати од новите европски регулативи.

Сопствениците на имот ширум регионот ќе мора да инвестираат огромни суми во реновирање за да се осигурат дека нивните згради нема да испуштаат незаконски нивоа на јаглерод диоксид или да користат прекумерна количина на енергија, велат адвокатите кои го советуваат секторот.

Јагленот, највалканото фосилно гориво, полека се подготвува за збогум

Повеќе од две години откако преговарачите за климата првпат се обидоа да го испратат јагленот во историјата, највалканото фосилно гориво го има својот момент.

Благодарение на комбинацијата од повеќе фактори, како енергетската несигурност на Кина која го турка Пекинг назад кон сигурни извори на енергија, плус зголемената индиска побарувачка, континуираните последици од војната во Украина и ненадејните меѓународни програми за одвикнување на економиите во развој од фосилните горива, јагленот се покажа неверојатно отпорен. Производството достигна рекорд минатата година, а производителите се подготвуваат за иднината во која ќе треба да ја балансираат обновливата енергија во наредните децении.

Вештачката интелигенција ќе помогне за исполнување на климатските цели

Тим Кук вели дека вештачката интелигенција е суштинска алатка за компаниите посветени на намалување на нивниот јаглероден отпечаток. Извршниот директор на „Епл“ се приклучи на дијалогот за климатските промени во неделата на форум во Пекинг, продолжувајќи ја неделата на јавно прикажување на посветеноста на неговата компанија кон Кина.

Кук учествуваше во дискусија на годишниот Форум за развој на Кина за јаглеродната неутралност и климатските промени и како компаниите можат да ги намалат негативните влијанија врз нивното работење. „Епл“ постави некои од најамбициозните цели меѓу компаниите од овој сектор за намалување на јаглеродниот отпечаток – со „Епл Воч“ кој се смета за негов прв производ неутрален од јаглерод.