.webp){kind=icon}
Почна долго најавуваното намалување на каматните стапки. Европската централна банка иако проценува дека инфлацијата ќе биде повисока од прогнозираното, вчера соопшти дека каматата на депозитите ќе биде пониска за 0,25 базични поени. Искуството покажува дека НБРМ секогаш ги следи чекорите кои ги презема ЕЦБ што значи дека идната недела може да се очекува првото намалување на референтната камата и во земјава.
Следното прашање е кога ќе се почувствуваат ефектите од олабавувањето на монетарната политика. Извештаите на НБРМ покажуваат дека македонските компании кои веќе должат повеќе од 3,5 милијарди евра помалку бараат кредити токму поради заострените услови за кредитирање. Долговите отвораат работа на извршителите кои за 18 години наплатите 1,9 милијарди евра.
Неделава државната статистика ги објави податоците за бруто домашниот производ во првиот квартал од годината. Економијата скромно пораснала за 1,2 отсто, а растот е движен од потрошувачката на домаќинствата. Според нашите аналитичари, токму потрошувачката водена од зголемените плати ќе биде елементот кој ќе го турка БДП нагоре и во следниот период.
Потрошувачката расте и покрај високите цени кои според експертите нема да се вратат на нивото од пред кризата дури ни кога инфлацијата ќе се врати на целта од два отсто. За разлика од цените на храната кои веќе никогаш нема да бидат ниски, горивата во земјава се најевтини во споредба со регионот, и тоа во време кога давачките за увоз на возила се највисоки.
Движењето на македонската економија многу ќе зависи од случувањата во Германија, а нарачките во тамошните фабрики и натаму паѓаат. Бројките за невработеноста во најголемата европска економија исто така не се добри што според тамошните експерти е знак дека пролетното закрепнување не започнало.
Важен сектор за домашната економија е и градежништвото каде главен проблем е недостигот на работна сила. Токму тоа е причината што во земјава и натаму се гради како пред 100 години. Анализиравме и како недостигот на работници ја зголеми и моќта на синдикатите. Компаниите каде има синдикати во услови на висока инфлација обезбедија и поголеми плати и подобри услови за работа, но во земјава сè уште има менаџери кои не дозволуваат формирање синдикат.
Синдикат не им треба на пратениците од минатиот состав. 29 од нив ќе добиваат апанажа по престанокот на мандатот. А мандат за формирање нова влада вчера доби Христијан Мицкоски, лидерот на ВМРО-ДПМНЕ. Според роковите, владата треба да се формира за 20 дена, но мандатарот смета дека процесот ќе заврши многу побрзо.
