Македонија од вчера е во портокалова фаза. Топлотниот бран ќе продолжи и во текот на продолжениот викенд за кога УХМР најавува температури и до 40 степени. Поради опасностите од високите температури на сила се препораките од Министерството за здравство за заштита на населението. Утрово, и ние ви нудиме неколку совети за справување со горештините.
Добро утро, ова се другите пет вести кои се важни за денеска
Наследувањето во семејните фирми во регионот оди потешко
Колку лесно се случува транзицијата на раководството кај семејните компании, која генерација е на нивно чело, колку овие бизниси прифаќаат промени како дигитализацијата, се само дел од прашањата во анкетата која во период од ноември лани до јануари годинава ја спроведе „Прајсвотерхаускуперс“ (ПвЦ).
Анкетата беше спроведена во 63 земји и беа интервјуирани 889 лица. Во регионот анкетата била спроведена во 11 земји (Бугарија, Хрватска, Чешка, Грузија, Унгарија, Северна Македонија, Полска, Романија, Србија, Словачка и Словенија) и беа направени 179 интервјуа.
Пензиските друштва имаат рецепт за социјална сигурност и повисок стандард
Изминуваат речиси две децении од официјалниот почеток на пензиската реформа во Македонија со која беше воспоставен тростолбен пензиски систем со комбиниран начин на финансирање на идните пензии и со диверзификација на демографските и економските ризици. Примарна цел на реформата во која покрај државата и Фондот за пензиско и инвалидско осигурување, главни носители се пензиските друштва кои управуваат со задолжителните пензиски фондови од вториот столб и со доброволните пензиски фондови од третиот столб е обезбедување посигурна пензија за сегашните и идните генерации пензионери и долгорочна финансиска стабилност на пензискиот систем.
Со оглед на тоа што постојано се јавуваат нови демографски и економски предизвици на национално и на глобално ниво, македонската редакција на „Блумберг Адрија“ на тркалезната маса „Not so small talk“ ги покани претставниците на трите пензиски друштва во Македонија за да ги чуе нивните видувања за актуелните случувања и нивните идеи за натамошен развој на пензискиот систем. Во рамките на дебатата разговаравме со Весна Стојановска, претседателка и член на Управниот одбор на „КБ Прво пензиско друштво“, Петар Талески, член на Управниот одбор на „Сава пензиско друштво“ и Тихомир Петрески, претседател и член на Управниот одбор на „Триглав пензиско друштво“.
Осигуреници за пет месеци наплатија 5,3 милиони евра од приватно здравствено осигурување
Осигурениците што имаат дополнително (приватно) здравствено осигурување за првите пет месеци од годинава наплатиле 5,3 милиони евра за медицински трошоци покриени со нивните полиси за здравствено осигурување. Осигурителните компании годинава исплатија 1,2 милион евра повеќе пари за медицински трошоци покриени со осигурување во споредба со истиот период лани покажуваат податоците на Агенцијата за супервизија на осигурувањето (АСО).
„Во зависност од видот на осигурувањето, премијата и осигурените суми, осигурениците добиваат покритија за трошоци направени за приватни прегледи, испитувања, снимања и операции. Приватното здравствено осигурување е најпопуларен осигурителен продукт меѓу другото и затоа што сè поголем број компании го користат во своите политики за привлекување работници, а наедно и за лојалност за вработените“, соопшти АСО.
Топлотен бран во Грција, висока готовност за евакуации
Неколку грчки региони, вклучувајќи го и поширокиот дел на Атина, се во црвена температурна готовност поради шумски пожари, додека пожар веќе принуди евакуација на едно село на островот Наксос.
Минатата година шумските пожари принудија масовни евакуации низ Грција, насекаде од Родос до Крф, загрозувајќи ја егзистенцијата на локалното население, кое пак зависи од летните посетители. Околу 1,3 отсто од копнената површина на медитеранската нација беше уништена во 2023 година, што е четири пати повеќе од просекот во претходните 17 години.
Ким му вети „безусловна“ поддршка на Путин за војната во Украина
Севернокорејскиот лидер Ким Џонг Ун ѝ вети „безусловна поддршка“ на Русија во нејзината инвазија на Украина на разговорите со претседателот Владимир Путин во Пјонгјанг, на кои беше истакнато продлабочувањето на врските поради загриженоста на САД за снабдување со оружје за воената машина на Кремљ.
Ким рече дека Русија игра клучна улога во одржувањето на стратегиската рамнотежа во светот, додека Путин рече дека се надева дека Ким ќе го посети во Москва.
.webp){kind=icon}
