Основачот на „Викиликс“, Џулијан Асанж, пред американски суд во Саипан се изјасни за виновен за прекршување на Законот за шпионажа на САД, во спогодба со американскиот правосуден систем со која заврши долгата правна битка и ја напушти судницата како слободен човек.
Судијката Рамона Манглона ја одобри спогодбата со обвинителите, ставајќи ѝ крај на 14-годишната сага. Во согласност со спогодбата, таа го осуди на затворска казна, која тој веќе ја одлежа. Асанж помина пет години во затвор во Велика Британија.
По читањето на пресудата, обвинителството веднаш го повлече барањето за екстрадиција на Асанж, што беше голем момент со оглед на тоа што основачот на „Викиликс“ помина години на суд обидувајќи се да избегне екстрадиција во САД. Судoт посочи дека американската влада се согласила да не води понатамошна кривична постапка, Асанж се насмевна кога судијката му честиташе роденден (наредната недела ќе наполни 53 години), велејќи дека се надева дека ќе го започне својот нов живот на позитивна нота.
Прочитајте повеќе: Асанж постигна договор со САД и ќе може да се врати дома
Асанж (52) се изјасни за виновен на сослушувањето на Северните Маријански Острови по едно обвинение што го товари за заговор за добивање и објавување доверливи документи за одбрана на САД. Тој сега е слободен човек и може да се врати во родната Австралија по години во егзил.
Платформата на Асанж, „Викиликс“, објави илјадници доверливи американски воени документи за американската инвазија врз Авганистан и Ирак.
Вашингтон тврдеше дека Австралиецот со тоа ги загрозил животите на американските агенти и дека нема оправдување за неговите криминални дела. Неговите поддржувачи, од друга страна, го слават како херој што беше обвинет за откривање американски злосторства.
Во 2010 година, меѓу другото, „Викиликс“ објави видео од американски воени хеликоптери што убиваат цивили во главниот град на Ирак, како и информации за стотици цивили убиени за време на американската инвазија на Авганистан.
Британската полиција го уапси Австралиецот во 2019 година во Амбасадата на Еквадор во Лондон, каде што престојуваше седум години.
.webp){kind=icon}
