.webp){kind=icon}
Инфлацијата во еврозоната забави во јуни – што е доказ дека ценовните притисоци постепено се намалуваат и дека растот на цените се движи кон целта на Европската централна банка од два отсто. Сепак, според претседателката Кристин Лагард Европската централна банка сè уште нема доволно докази дека заканите за инфлација поминале. Со ова таа ги потхрани очекувањата дека официјалните лица ќе направат пауза од намалувањето на каматните стапки месецов.
Добро утро, ова се останатите пет вести важни за почеток на денот.
Меѓународни „тешкаши“ заработуваат на македонскиот јавен долг
Реномирани меѓународни инвестициски фондови, банки и инвестициско-советодавни куќи кои управуваат со портфолија тешки илјадници милијарди долари заработуваат од каматите и од тргувањето со македонските еврообврзници односно од финансирањето на јавниот долг на Македонија. Според податоците од терминалот на „Блумберг“ меѓу најголемите инвеститори во нашите еврообврзници се компании од САД, Германија, Луксембург, Велика Британија и од повеќе европски земји.
Станува збор за македонските еврообврзници издадени во јануари 2018 година, јуни 2020 година, март 2021 година и во март 2023 година во номинален износ од 500 милиони евра, 700 милиони евра, 700 милиони евра и 500 милиони евра, соодветно, со рок на достасување од 7, 6, 7 и 4 години и годишни каматни стапки од 2,75 проценти, 3,675 проценти, 1,625 проценти и 6,96 проценти, соодветно. Овие хартии од вредност зафаќаат значителен дел од јавниот долг на нашата земја, кој во првиот квартал достигна 8,7 милијарди евра.
Десет компании кои треба да нè интересираат годинава
„Блумберг“ објави листа од десет компании на кои треба да се внимава во третиот квартал од 2024 година. Листата е направена врз основ на сценарија за секоја од компаниите подготвени од „Блумберг Интелиџенс“ (Bloomberg Intelligence).
Станува збор за компании кои имаат големо влијание во нивните сектори и во цели региони и за кои аналитичарите на „Блумберг Интелиџенс“ даваат прогнози базирани на различни податоци.
ОН усвои резолуција за вештачка интелигенција предложена од Кина
Генералното собрание на Обединетите нации усвои резолуција предложена од Кина, а поддржана од САД, со која се повикуваат богатите развиени земји да го премостат сè поголемиот јаз со сиромашните земји во развој и да обезбедат да имаат еднакви можности за користење вештачка интелигенција (ВИ).
Резолуцијата беше усвоена вчера, по усвојувањето на првата резолуција на ОН за вештачка интелигенција на 21 март, предложена од САД. Усвојувањето на двете необврзувачки резолуции покажува дека САД и Кина, ривали на многу полиња, се решени да бидат клучни играчи во обликувањето на иднината на вештачката интелигенција и да соработуваат во првите големи меѓународни чекори на ова поле.
Први сојузни мерки за заштита на работниците од жештини во САД
Администрацијата на американскиот претседател Џо Бајден го откри својот план за наметнување на првите сојузни стандарди за заштита на американските работници од топлотен стрес, со предложени мерки кои би можеле да значат повеќе паузи, сенка и вода за пиење за луѓето кои работат на градилиштата, во челичарниците и други објекти изложени на високи температури.
Предлогот на Министерството за труд, кој беше објавен во вторникот, доаѓа во време на рекордно високи температури низ САД и додека климатските промени ги интензивираат ризиците за работната сила во Америка. Екстремните горештини се најголемиот убиец поврзан со временските услови во САД, а работниците често се на првата линија на фронтот, а илјадници се разболуваат од професионална изложеност на топлина.
Евакуирани туристи од грчките острови поради пожари
Грчките пожарникари се борат да ги стават под контрола шумските пожари на некои од најголемите острови во земјата, поради што властите започнаа евакуација токму во време на главната туристичка сезона.
И посетителите и локалните жители беа замолени да го напуштат селото Кардамена на островот Кос во понеделникот вечерта, бидејќи пожарите се приближуваа и се закануваа на имотите. Амбасадата на Обединетото кралство во Грција им порача на посетителите преку социјалната мрежа X да се придржуваат до наредбите на властите.
