text size
Иако во технолошката индустрија не се ретки директорите околу кои се создава речиси култ на личност и кои се опседнати со детали, Хуанг е посебен случај. Тој ја води компанијата од нејзиното основање пред 33 години, подолго од кој било друг директор во Силициумската долина. Дури и откако „Енвидија“ прерасна во една од најмоќните компании во светот, со принос од повеќе од 700.000 отсто на нејзините акции, сè уште никој официјално не е назначен за негов можен наследник.
Недостигот од план за избор на наследник особено дојде до израз оваа недела, откако Хуанг призна афера со жена осомничена за шпионажа во корист на Кина. Кризата дополнително покажа колку 63-годишниот директор и успехот на компанијата се нераскинливо поврзани, нешто што и самиот претходно го призна.
Добро утро! Ова се петте вести што треба да ги знаете на почетокот на денот, во избор на дигиталната редакција на „Блумберг Адрија“ од Скопје.
Може ли и „Антропик“ од малите акционери да направи милионери?
Кога „Амазон“ излезе на берза во мај 1997 година, неговата акција чинеше 18 долари. Кога ќе се земат предвид сите досегашни поделби на акцијата (split), денешната вредност на овие 18 долари е околу 64.000 долари, или принос од околу 350 илјади проценти.
Инвеститорите сега се прашуваат дали и „Антропик“, еден од најголемите играчи во сферата на вештачката интелигенција (ВИ), може да биде следната таква приказна.
Компанијата што стои зад ВИ-моделот Клод (Claude) се подготвува за едно од најголемите ИПО-а во историјата. Се спомнува вреднување од 1,5 до два билиона долари, а во јавниот проспект доставен до американската Комисија за хартии од вредност веќе се наѕира бизнис што расте со темпо какво што ретко се среќава, дури и кај најуспешните технолошки компании.
Хамбургер над 280 денари: Зошто цената расте толку брзо?
Хамбургерот во една култна скопска сендвичарница минатиот месец стигна до 280 денари и тоа беше главна тема за дебата на социјалните мрежи. Пред да поскапи во октомври производот се продаваше за 250 денари и таа цена важеше од 2024 година.
Јавноста бурно реагираше на ова зголемување на цената на хамбургерот за 30 денари или околу 12 отсто. Но, анализата на статистичките податоци покажува дека основната состојка на хамбургерот, месото, поскапело над 25 отсто за истиот период. Или јунешкото сега е за 27,5 отсто поскапо отколку во 2024 година, а цената на килограм телешко е повисока за 25 отсто, покажуваат податоците на Државната статистика.
Ценовниот шок кај овој тип на месо е глобален проблем. Само во последните 12 месеци цената на живите говеда на светските берзи исто така е зголемена за околу 25 отсто.
Хакери во напад на супермаркети
Новиот бран на таканаречени хибридни напади, кој во изминатите десетина дена ја стави Европа во состојба на висока подготвеност, сериозно го вовлече малопродажниот сектор во арената на геополитичките пресметки. Во низата лажни дојави за поставени бомби во патнички авиони, закани упатени кон медиумски куќи и сајбер напади врз системите за контрола на банките за крв, се најдоа и сајбер нападите врз системите за ладење на големите европски синџири супермаркети.
Иако се проценува дека како последица на сите овие напади се предизвикани загуби од повеќе десетици милиони евра, на големите играчи во малопродажниот сектор сè појасно им станува дека заштитата на ладилниците и замрзнувачите во супермаркетите не е само дел од нивната одговорност за безбедноста на храната и финансиското работење, туку и дел од цивилната одбрана во време кога саботажите стануваат составен дел од современата европска безбедносна архитектура.
Западните медиуми и безбедносните експерти се сомневаат дека зад хакерските напади стојат руските разузнавачки служби, што Москва категорично го негира. Франција, пак, отворено го впери прстот кон Иран, поточно кон Иранската револуционерна гарда.
Собранието го усвои ребалансот на Буџетот
Собранието вчера го усвои дополнетиот ребаланс на Буџетот за 2026 година, со кој се врши надолна корекција и на приходната и на расходната страна, додека планираниот буџетски дефицит останува непроменет и изнесува 46,3 милијарди денари.
Со измените, вкупните приходи се проектирани на 374,2 милијарди денари, што е за околу 5,3 милијарди денари помалку од првичните проекции за оваа година. Истовремено, се намалуваат и вкупните расходи, кои сега се планирани на 420,5 милијарди денари.
Образложувајќи го дополнетиот ребаланс пред пратениците, министерката за финансии Гордана Димитриеска-Кочоска посочи дека целта на Владата е да ја зачува економската стабилност и да одговори на предизвиците што произлегуваат од продолжените глобални геополитички случувања. Според неа, измените се насочени кон одржување на стабилноста на Буџетот до крајот на годината и обезбедување сигурност за граѓаните и стопанството.
Инфлацијата во САД над очекувањата
Клучниот показател за потрошувачките цени во САД повторно значително порасна во октомври, поради што се очекува Федералните резерви (Фeд) следниот месец да ги зголемат каматните стапки.
Индексот на потрошувачките цени, без храната и енергентите, порасна за 0,3 отсто во однос на претходниот месец, покажуваат податоците на Бирото за статистика на трудот (англ. Bureau of Labor Statistics - БЛС), објавени во вторникот. Со тоа очекувањата беа надминати трет месец по ред. Вкупните потрошувачки цени пораснаа за 0,4 отсто, со поскапување на основните животни намирници.
Ова е последниот извештај за индексот на потрошувачките цени што претставниците на Фед ќе го добијат пред состанокот на 8 и 9 декември, на кој ќе одлучуваат за монетарната политика. Инвеститорите очекуваат тогаш да ги зголемат каматните стапки за да ја сузбијат инфлацијата, по зголемувањето за четвртина процентен поен во септември и одлуката во октомври да ги задржат на непроменето ниво.
.webp){kind=icon}
