По барање од Министерството за здравство, Владата донесе препораки за новиот топлотен бран што се очекува да ја зафати државата во следните три дена, по информациите добиени од Институтот за јавно здравје и метеоалармот на Управата за хидрометеоролошки работи (УХМР).
Во препораките за намалување на ризиците од високите температури што ги усвои Владата на вчерашната седница се предвидува ослободување од работните обврски на најранливите групи население, односно бремените жени и лицата на возраст над 60 години, од 12 до 14 август 2024 година.
Во истиот период работодавците треба да ги реорганизираат работните активности на градежните работници и на работниците што работат на отворено, така што ќе се избегне вршење градежни и други работни активности на отворено во периодот од 11 до 17 часот.
Владата препорачува и во установите за згрижување на децата (градинки) да не се практикува физичка активност и да не ги изнесуваат децата на отворено во периодот од 11 до 17 часот.
Единиците на локалната самоуправа, Црвениот крст и центрите за социјални работи во регионите зафатени со топлотниот бран треба да им нудат помош на осамените, стари и изнемоштени лица и на бездомниците.
Во соопштението од владината прес-служба се додава дека со оглед на фактот дека одредени ризични производствени и технолошки процеси може да претставуваат дополнителен ризик по здравјето на изложените работници, Владата ги потсетува работодавците на обврската за почитување на законските прописи од оваа област.
Од УХМР информираа дека до крајот на седмицата нѐ очекува претежно сончево и многу топло време.
Топлото време е под влијание на многу топла воздушна маса од југ, а особено ќе биде топло до среда, кога дневната температура наместа ќе надминува 40 Целзиусови степени и на повеќе места ќе биде активирано портокалово ниво за опасност од високи температури.
И покрај високите температури, од УХМР соопштуваат дека од среда до петок во попладневните и вечерните часови ќе има локална појава на нестабилност со пороен дожд, грмежи, засилен ветер и услови за изолирано невреме со интензивен пороен дожд, грмежи, силен ветер и град.
.webp){kind=icon}
