Мнозинството швајцарски гласачи се за ограничување на градежништвото и на земјоделството за подобра заштита на природата и биодиверзитетот, покажа првото истражување на јавното мислење пред референдумот што ќе се одржи следниот месец.
Еколошките организации се залагаат за измена на уставот за да се вклучи посилна заштита на природните резервати. Владата и парламентот се против оваа мерка, наведувајќи дека таа може да ги загрози економскиот раст, земјоделството и поставувањето нови електроцентрали базирани на обновливи извори на енергија. Гласањето е закажано за 22 септември.
Во анкетата, која во петокот ја објави јавната телевизија СРГ ССР (SRG SSR), 51 отсто од испитаниците се за мерката, додека 43 отсто се против. Тоа би можело да сигнализира близок резултат и на референдумот, бидејќи процесот на формирање мислење е веќе во средна и напредна фаза, посочува спроведувачот на анкетата gfs.bern.
Анкетата покажа дивергенција во поддршката по партиска линија - гласачите на левите и зелените партии се првенствено во таборот „да“, гласачите од центарот и десницата се склони кон „не“. Поделба покажуваат и полот и местото на живеење.
„Мажите и луѓето што живеат во руралните области се главно против иницијативата“, наведува gfs.bern. „Жените и луѓето што живеат во урбаните средини генерално сакаат да гласаат ’за’“.
Гласачите ќе гласаат и за владината реформа на пензиските фондови на компаниите. Планот бара, меѓу другото, пониски бенефиции за пензионирање и повисоки одбитоци од платите за да се справуваат со подолгиот животен век на населението. Синдикатите ги собраа потребните 50.000 потписи за да го оспорат предлогот на референдум.
За ова прашање, според анкетата, сè уште не е формирано јасно мнозинство. Анкетата во моментов покажува дека 49 отсто се за измените, 39 отсто се против, а преостанатите се неопределени. Тоа значи дека отсега е невозможно да се предвиди исходот, соопшти gfs.bern.
.webp){kind=icon}
