Анализите за транспортот на BloombergNEF (BNEF), како обезбедувач на стратешки истражувања, најчесто се фокусираат на декарбонизацијата, вклучително и на тоа како се менува погонот на возилата. Но, уште еден витален аспект за емисиите во патниот транспорт се податоците колку возила има по патиштата. Ставот на аналитичарите од BNEF е дека возниот парк ќе продолжи да расте најмалку уште една деценија.
Најновиот извештај прикажува сценарио за патниот транспорт за следните децении каде што глобалната флота на патнички возила се зголемува од 1,2 милијарди на рекорд од нешто повеќе од 1,5 милијарди во 2039 година. BNEF очекува годишната продажба во светот да достигне врв во 2036 година, ставајќи крај на растот по повеќе од еден век.
Промените во основната возраст на возачката популација исто така се моќен фактор во прогнозите. Според бројките на Обединетите нации, работоспособното население во Европа ќе се намали за 11 отсто до 2040 година, додека во Јапонија и Јужна Кореја ќе се намали за повеќе од 20 отсто. Кина, најголемиот светски пазар на автомобили ќе забележи намалување на работоспособното население за 14 отсто. Во истиот период, уделот на глобалното население со 69 години или повеќе ќе се зголеми на 10 отсто од 4 отсто. Во извештајот се наведува дека ваквите промени спречуваат изгледите за користење на патнички возила да бидат повисоки.
Урбанизацијата е уште еден главен двигател за прогнозите. Урбанизацијата во Индија и другите пазари со низок до среден приход, како што се Бразил, Русија, Мексико, Јужна Африка и Турција, значи дека повеќето жители на урбаните области, особено оние кои живеат во пренатрупаните мегаградови, ќе сметаат дека поседувањето патничко возило е поскапо или помалку погодно отколку поседувањето, на пример, на велосипед или од користењето на јавен превоз. Ова се одразува на продажбата на патнички возила во Индија, која се приближува до 8 милиони единици до 2040 година, но никогаш не ја надминува таа бројка поради зголемениот метеж во градовите и поголемата продажба на средства на две тркала, кои веќе претставуваат најголема бројка на возила што се продаваат секоја година во земјата.
Bloomberg Mercury
Бројот на возила на патот зависи и од тоа кој или што е зад воланот. По автомобил, споделуваните и самоуправувачките возила во просек поминуваат повеќе километри од приватните возила. Според прогнозите на аналитичарите од BloombergNEF, споделуваните и автономните возила се растечки дел од возниот парк, но сепак приватните возила и натаму се во поголем број.
Овој тренд има значаен ефект врз комбинацијата на погонски склоп, бидејќи споделуваните и автономните возила е многу поверојатно да бидат електрични. На крајот на минатата година, кај приватниот возен парк електричните возила имале удел од малку повеќе од 1 отсто, што е далеку пониско во споредба со 6 отсто од споделуваните (на пример, службен транспорт, такси или услуги за превоз како „Убер“) и автономните возила. Сепак, приватните возила сочинуваат 98,7 отсто од глобалната флота.
Мерките исто така ќе влијаат на стапката со која споделуваните возила се електрифицираат. Преку следење на регулативите или преку растечкото чувство за тоа што сакаат нивните клиенти, сите големи компании за услуги за градски превоз сега имаат програми за охрабрување на возачите да купат електрични возила. Мнозинството од ваквите сервиси имаат поставено и специфични цели за целосно усвојување на електрични возила (ЕВ) во нивниот возен парк. Иако овие компании обично не ги поседуваат возилата што се користат во рамки на нивната платформа, тие ги тестираат условите за пошироко усвојување на ЕВ.
Долгорочните прогнози, како што е и извештајот на BloombergNEF, се занимаваат со многу фактори кои дури и малку изменети, може да имаат значително влијание врз резултатите. BloombergNEF ќе продолжи да ги следи краткорочните случувања околу продажбата на возила, деловните модели за споделувани возила и технологијата за самоуправување, бидејќи тие јасно ќе влијаат врз способноста на транспортната индустрија да се декарбонизира.
.webp){kind=icon}