БИЗНИС
Маск го претстави роботаксито „сајберкеб“ (Cybercab)
Илон Маск ги претстави долгоочекуваните прототипи на роботаксито на „Тесла“ наречено „сајберкеб“. На настанот на „Тесла“ во Бурбенк, Калифорнија, Маск се возеше во еден од прототипите на патот до сцената. Притоа, најави дека производството може да започне во 2026 година, а возилото би можело да чини помалку од 30.000 долари. Компанијата „Тесла“, исто така, го претстави концептот „робовен“ (Robovan), за кој Маск тврди дека може да превезува 20 луѓе истовремено.
ЕКОНОМИЈА
Франција го стега ременот
Француската влада го претстави буџетот за наредната година кој изнесува 60,6 милијарди евра. Целта е обновување на лошата состојба на јавните финансии и враќање на довербата кај инвеститорите. Повеќе од две третини од буџетските мерки ќе бидат насочени кон намалување на трошоците, а остатокот ќе дојде од повисоки даноци за компаниите и богатите поединци.
Буџетот на премиерот Мишел Барние за 2025 година поставува долна граница од 20 проценти на даночната стапка за поединци кои заработуваат 250.000 евра (273.000 долари) годишно, или за двојки кои заработуваат двојно повеќе. Министерството за финансии соопшти дека оваа мерка ќе трае три години и ќе опфати околу 65.000 домаќинства, а во буџетот ќе се влеат околу две милијарди евра.
ЕЦБ го забрзува темпото на намалување на каматите?
Следната недела е состанокот на Европската централна банка. Економистите анкетирани од „Блумберг“ (Bloomberg) очекуваат дека во четврток, и на секој состанок до март, ќе се намалува каматната стапка на депозитите за четвртина процентен поен, бидејќи инфлацијата е под целта од два процента. Потоа, се предвидуваат уште две намалувања – во јуни и декември следната година – со што референтната вредност би достигнала два процента до крајот на 2025 година.
Bloomberg
ОПШТО
Најмалку десет мртви во ударот на ураганот Милтон
Ураганот Милтон, кој ја погоди Флорида, остави зад себе најмалку 10 мртви, милиони луѓе без струја и уништени домови и посеви. Властите на Флорида предупредуваат дека ќе поминат денови додека целосно се проценат штетите. Ураганот Милтон удри силно и брзо во централниот дел на државата само неколку часа пред да се врати кон Атлантикот. Брановиот удар кој во средата стигна до западниот брег на Флорида беше отприлика двојно помал од очекуваниот.
БЕРЗИ
Европа
Фјучерсите на европските индекси утрово се мешани. Берзите во Европа поцрвенеа во четвртокот, откако новите податоци од САД покажаа дека инфлацијата таму е отпорна. Вредноста на европските акции варираше последниве недели, под притисок на повеќе ризици, вклучувајќи ги конфликтите во Украина и на Блискиот Исток, како и неизвесноста околу кинеската економија. Инвеститорите исто така се подготвуваат за објавување на извештаите за заработка на компаниите во третиот квартал.
САД
Од другата страна на Атлантикот, фјучерсите на американските индекси претежно се во пораст, иако вкупната инфлација во САД во септември се зголеми повеќе од очекуваното. Годишната инфлација во САД во септември изнесуваше 2,4 проценти, што е помалку од августовските 2,5, но повеќе од очекуваните 2,3 проценти. На месечно ниво, растот на потрошувачките цени изнесува 0,2 проценти (се предвидуваше 0,1). Основната инфлација на годишно ниво порасна за 3,3 проценти (се очекуваше 3,2 проценти), а на месечно ниво за 0,3 проценти (очекувано беше 0,2 проценти).
Новите макроекономски податоци ја засилуваат дебатата дали Федералните резерви (Фед) ќе продолжат со намалување на каматните стапки на следниот состанок во ноември, или ќе паузираат овој пат.
Азија
Во азиско-пацифичкиот регион, акциите се тргуваат мешано. Кинеските берзи паднаа поради зголемената претпазливост пред утрешната клучна прес-конференција, која може да донесе повеќе информации за фискалните стимулации на Пекинг. Индексот CSI 300 падна за 1,9 проценти, поради што претходните добивки од четвртокот беа избришани. Во другите делови на Азија, акциите пораснаа во Јапонија и Јужна Кореја, додека во Австралија останаа стагнантни.
НАФТА
Цените на нафтата благо паднаа додека Израел се подготвува за одмазда против Иран, што предизвикува сомнежи за можни прекини во снабдувањето со сурова нафта од Блискиот Исток.
Брентот беше близу до 79 долари за барел, што е пораст од еден процент во текот на неделата, додека ВТИ (West Texas Intermediate) беше под 76 долари.
.webp){kind=icon}
