.webp){kind=icon}
Новите технологии се значајни за поголеми промени и треба да се држи чекор со нив. А, содржините на „Блумберг Адрија“ се објавуваат и дистрибуираат на начин што им одговара на гледачите и на читателите, смета директорката за содржина на „Блумберг Адрија“, Јелисавета Лазаревиќ, која говореше на отворањето на конференцијата на „Блумберг Адрија“, под наслов „Back to business: Економски потенцијал и развојни можности на Македонија“.
„Нашите содржини се достапни во различни форми, нашиот контент е сеопфатен, има различни содржини и се објавуваат на начин што вам ви одговора и во време кога вам ви одговара“, рече директорката за содржини на „Блумберг Адрија“, посочувајќи дека медиумот работи на пет пазари (Македонија, Србија, Босна и Херцеговина, Хрватска и Словенија), а дигиталната платформа нуди теми што даваат длабински анализи одработени од околу 130 новинари и аналитичари.
„Имаме ТВ-канал, друштвени мрежи и секое утро нудиме билтен со пет важни вести што ќе ве водат низ денот. Во Македонија, како и во сите држави, е присутна нашата дигитална платформа, каде што секој ден може да најдете вести од повеќе области. Тоа што нè разликува е нашиот аналитички тим, кој секојдневно ни дава анализи и извештаи, кои, пак, вам ви овозможуваат да ги креирате своите бизнис-очекувања и во следниот период да носите одлуки што се важни за вашиот бизнис“, изјави директорката за содржина на „Блумберг Адрија“, Јелисавета Лазаревиќ.
Освен пишаните содржини, тука е и телевизијата. Неизбежен дел од продуктите на „Блумберг Адрија“ е и месечниот магазин „Блумберг бизнисвик Адрија“ (Bloomberg Businessweek Adria), а на крајот сите вести, интервјуа и анализи се достапни на нашата телефонска апликација, потенцира Лазаревиќ.
