.webp){kind=icon}
Најмалку 158 лица загинаа во катастрофалните поплави во Шпанија, предизвикани од обилни дождови на 28 октомври.
„Бројот на загинати изнесува 158, а треба да се додадат и десетици исчезнати лица“, изјави на прес-конференција Анхел Виктор Торес, министер задолжен за соработка со шпанските региони.
Се очекува бројот на жртви да се зголеми, бидејќи спасувачките екипи и понатаму трагаат по исчезнати.
Војската е повикана да помогне во областите погодени од поплавите во Валенсија од денеска наутро, според регионалниот претседател.
Прочитајте повеќе: Во Шпанија почна политичка расправија за големиот број жртви од поплавите
„Само што побарав вклучување на армијата и расположливите копнени, морски и воздушни сили за зајакнување на логистичките задачи и дистрибуција на помош до населението“, соопшти тој во објава на социјалната мрежа Х.
„Воената единица за итни случаи ме информира дека утре во 8 часот ќе започнат со работа првите екипи“, додаде тој.
Повеќе од 1.000 војници од шпанските единици за спасување за итни случаи веќе им се придружија на регионалните и локалните работници за итни случаи вчера во потрагата по тела и преживеани. Министерот за одбрана рече дека само војниците до синоќа извлекле 22 тела и спасиле 110 лица.
Според извештаите, на 29 октомври во делови од Валенсија за осум часа паднало количество дожд што е еднакво на просечното годишно количество за тој регион.
Најголемиот дел од вкупниот број на жртви - 155 се во Валенсија, додека две лица загинаа во Кастилја-Ла Манча на запад од покраината, а едно лице, британски државјанин, загина во Андалузија.
Вчера спасувачките тимови, и покрај силниот дожд, пронајдоа тела на осум лица, меѓу кои и локален полицаец, кои биле заглавени во гаража на периферијата на градот Валенсија, изјави градоначалничката Марија Хозе Катала за медиумите.
