Федералните резерви на САД, како што се очекуваше, во средата ја намалија референтната каматна стапка третпат по ред, овој пат за 25 базични поени. На Стариот Континент, германската влада е незадоволна од потегот на „Уникредит“ (UniCredit) и наводно побарала од нив да го продадат својот удел во „Комерцбанк“ (Commerzbank).
ЕКОНОМИЈА
Фед потврди помали намалувања во 2025 година
Официјалните лица на американските Федерални резерви ја намалија референтната каматна стапка третпат по ред, но најавија побавно темпо на намалување на каматите во текот на 2025 година - сигнализирајќи само две намалувања во текот на следната година. Така, каматната стапка овој пат е намалена за 25 базични поени, на целниот опсег од 4,25 до 4,5 проценти. Претседателот на Фед, Џером Пауел, на прес-конференција изјави дека ставот на Фед сега е „значително помалку рестриктивен, откако ги намали стапките за цел процентен поен“. Пауел додаде дека идните намалувања ќе зависат од натамошниот напредок во намалувањето на инфлацијата.
Централната банка на Јапонија ги задржа каматите на 0,25 проценти
Од друга страна, Централната банка на Јапонија ги задржа каматните стапки на стабилно ниво, што предизвика јапонскиот јен да падне под прагот од 155 јени во однос на американскиот долар. Централната банка ја остави референтната стапка на околу 0,25 проценти, како што очекуваа повеќе од половина од економистите анкетирани од „Блумберг“ (Bloomberg).
БИЗНИС
Германската влада незадоволна од потегот на „Уникредит“
Сагата околу германската „Комерцбанк“ продолжува. Имено, германската влада наводно побарала од „Уникредит“ да го продаде својот удел во „Комерцбанк“, само неколку часа откако италијанската банка го зголеми својот удел во германскиот кредитор на 28 проценти. „Уникредит“ во средата соопшти дека преземањето на акциите на „Комерцбанк“ било чиста инвестиција и дека во секое време може да ги продаде.
Bloomberg
БЕРЗИ
Европа
Фјучерсите на европските акции утрово претежно се тргуваат во зелено, пред одлуката на Централната банка на Англија за каматната стапка. Економистите очекуваат дека денеска веројатно ќе се прескокне намалувањето на трошоците за задолжување и ќе биде најавено само постепено намалување на каматите во 2025 година.
САД
Истовремено, фјучерсите на американските индекси претежно се тргуваат во црвено, откако Фед најави побавно темпо на намалување на каматите во следната година. Претседателот на Фед, Џером Пауел, изјави дека централната банка ќе биде повнимателна при приспособувањето на референтната стапка.
Пауел коментираше и за потенцијалните тарифи на новата американска администрација, наведувајќи дека е прерано за процена на последиците од таквите мерки. По одлуката на Фед, речиси сите американски индекси тргнаа надолу. Така, индексот S&P 500 во еден момент падна под нивото од 6.000 поени, што беше најлошиот резултат од август. И технолошкиот Nasdaq ослабе за 3,6 проценти, што е најголем пад во последните пет месеци.
Азија
Кога станува збор за акциите во азиско-пацифичкиот регион, тие претежно се тргуваат со загуби. Индексите во Јапонија, Австралија, Јужна Кореја и во Кина се тргуваат во црвено, по примерот на индексите на Волстрит.
НАФТА
Цената на нафтата падна поради очекувањата дека Федералните резерви следната година во помала мера ќе ги намалат каматните стапки, што го поттикна растот на доларот. Суровата нафта брент падна на околу 73 долари за барел, додека ВТИ (West Texas Intermediate) се тргуваше по цена од околу 70 долари.
Официјалните лица на Федералните резерви, како што се очекуваше, ги намалија каматните стапки во средата, но го намалија бројот на намалувања на каматите што се очекуваат во 2025 година. Доларот постигна најголем раст во повеќе од две години, што ја поскапе стоката за повеќето купувачи.
Bloomberg Mercury
.webp){kind=icon}
Во моментов нема коментари за веста. Биди прв да коментира...