Најголемата дигитална валута забави и денеска се тргува за 96.250 долари, додека инвеститорите ги анализираат ветувањата на Трамп за криптопазарот. Русија го одби повикот на Трамп за итен прекин на огнот во Украина, но вели дека е подготвена за преговори. Европските берзи по кратка пауза поради празниците повторно работат, а тргувањето утрово се одвива во зелено.
ПОЛИТИКА
Русија го одби повикот на Трамп за прекин на огнот во Украина
Русија го одби повикот на новоизбраниот американски претседател Доналд Трамп за итен прекин на огнот во Украина, но истакна дека е подготвена да одржи преговори за долгорочен мировен договор за завршување на речиси тригодишната војна.
„Прекинот на огнот е пат што не води никаде, а кој Украина ќе го искористи за да ги зајакне своите воени капацитети“, смета рускиот министер за надворешни работи Сергеј Лавров. Тој на онлајн прес-конференција истакна дека на Русија ѝ се потребни „конечни, правно обврзувачки договори што ќе ги создадат сите услови за гарантирање на безбедноста на Руската Федерација“.
Израел нападна позиции на Хутите во Јемен
Израел погоди повеќе цели во Јемен, кои, како што тврди, се под контрола на Хутите, и тоа само ден откако јеменските бунтовници поддржани од Иран извршија напад на Израел. Целите вклучуваа воена инфраструктура на аеродромот во Сана, три пристаништа и електроцентралите Хезијаз и Рас Канатиб. Најмалку шест лица загинаа, а 40 беа повредени во нападите, соопшти Министерството за здравство, кое е под контрола на Хутите.
КРИПТО
Запрен растот на биткоинот
Драматичниот раст на биткоинот запре во последните денови од годинава, бидејќи инвеститорите продолжуваат да ги анализираат ветувањата на Трамп за поддршка на криптопазарот. Така, најголемата дигитална валута денеска се тргува за 96.250 долари, со што делумно е намалена вчерашната загуба од речиси три проценти. Потсетуваме, вредноста на биткоинот достигна врв на 17 декември, кога накратко надмина 108.000 долари.
Bloomberg
БЕРЗИ
Европа
Фјучерсите на европските акции утрово се тргуваат во зелено. Потсетуваме, повеќето европски пазари на капитал во средата и четвртокот не работеа поради божиќните празници.
САД
Фјучерсите на американските индекси се тргуваат во црвено, откако бројот на барања за надомест за невработеност падна на 219.000 во неделата што заврши на 21 декември. S&P 500 во четвртокот стагнираше, додека технолошкиот Nasdaq 100 падна за 0,1 процент за време на придушеното тргување по празниците.
Азија
Акциите во азиско-пацифичкиот регион се тргуваат мешано. Додека акциите во Кина претежно се во црвено, јапонските акции растат, бидејќи слабоста на јенот им помогна на домашните извозници. Индексот MSCI порасна петти ден по ред, што е негов најдолг тренд на раст од јули.
НАФТА
Како што се приближуваме кон крајот на годината, инвеститорите проценуваат што ќе се случува со цената на нафтата во текот на 2025 година додека ги следат случувањата на Блискиот Исток.
Брентот се стабилизира, па се тргуваше по 73 долари за барел, откако во четвртокот загуби 0,4 проценти, додека ВТИ (West Texas Intermediate) беше под 70 долари за барел.
Bloomberg
.webp){kind=icon}