Маск вели дека дроновите и вештачката интелигенција се иднината на војувањето

Илон Маск, извршниот директор на „Спејс екс“ (SpaceX), изјави дека иднината на војувањето е во вештачката интелигенција и дроновите во новообјавено видео од неговиот разговор минатото лето на Воената академија на САД во Вест Поинт, Њујорк.

„Тековната војна во Украина веќе во голем дел е војна со дронови“, рече Маск, кој исто така раководи со „Тесла“ (Tesla Inc.) и со социјалната мрежа X. „Ако има војна меѓу големи сили, тоа претежно ќе биде војна со дронови“.

Милијардерот, кој сега игра значајна улога во американската влада преку неговата блиска врска со претседателот Доналд Трамп, рече дека САД треба да инвестираат во дронови и да го зголемат нивното домашно производство. Тој зборуваше во разговор покрај оган со бригадниот генерал Шејн Ривс, декан на Академскиот одбор на Воената академија, на 16 август. Маск објави линк до 40-минутниот разговор на X доцна во четвртокот.

Маск, кој рече дека често заспива слушајќи аудиокниги за воена историја, предупреди на неразумноста од страна на националните лидери. „Земјите се подготвени да ја водат последната војна, а не следната војна“, рече тој пред присутниот воен персонал.

Настапот во Вест Поинт летоска се случи непосредно пред Маск целосно да се вклучи во кампањата за реизбор на Трамп. Оттогаш, технолошкиот бизнисмен роден во Јужна Африка стана клучен играч во Вашингтон, каде што води агресивна кампања за ограничување на трошоците на федералната влада. Тимови од неговиот Оддел за ефикасност на владата, познат како DOGE, пристигнаа во неколку федерални агенции, каде што ги разгледуваат системите за податоци и ги испитуваат трошоците и договорите.

„Спејс екс“ (SpaceX) е клучен дел од она што претседателот Двајт Ајзенхауер славно го нарече воено-индустриски комплекс. Покрај лансирањето ракети за партнери како НАСА, неговиот сателитски систем познат како „Старлинк“ (Starlink) е достапен во над сто земји и територии.

„’Старлинк’ е во основата на украинскиот воен комуникациски систем затоа што не може да биде блокиран од Русите“, рече Маск. „На фронтот, сите оптички врски се прекинати, кулите за мобилни телефони се разнесени... Единственото нешто што функционира е ’Старлинк’“.

Маск исто така зборуваше за нешто што го нарече негов алгоритам за првите принципи, етички кодекс што го користи за да го води своето царство составено од неколку компании: Првиот чекор е да ги направите барањата „помалку глупави“, вториот чекор е да ги отстраните вишокот делови или процеси, третиот чекор е да оптимизирате и четвртиот чекор е „да се движите побрзо“.