Најтешко повредените од пожарот ќе бидат пренесени во странство

Дваесеттина најтешко повредени пациенти од пожарот во дискотеката во Кочани ќе бидат пренесени на лекување во странство, изјави денеска министерот за здравство Арбен Таравари. Според него, дел од пациентите ќе бидат транспортирани на лекување во Бугарија, Турција, Грција и Србија, а третман понудиле и од Албанија и Холандија.

Локални медиуми веќе пренесоа дека шестмина пациенти ќе бидат пренесени во Турција, а тројца во Грција.

„Според нашите анестезиолози, 18 до 20 пациенти ќе има потреба да ги транспортираме надвор од државата за понатамошно лекување, за тие што се покритични. Им оставив на екипата анестезиолози да одредат каде сметаат дека би било најдобро да се продолжи со натамошен третман за покритичните пациенти“, рече министерот.

Нашите колеги од српската редакција на „Блумберг Адрија“ информираат дека Министерството за одбрана и вооружените сили на Србија итно испратиле 14 лекари и друг медицински персонал, како и пет возила на Брза помош за да им пружат помош на повредените во пожарот во Кочани, од кои дел ќе бидат згрижени во Србија.

„Некои од повредените граѓани на Северна Македонија ќе бидат згрижени во Воената болница во Ниш, а оние чија состојба бара посериозно лекување ќе бидат транспортирани во Воено-медицинската академија во Белград. На властите на соседната земја им е понудена и дополнителна медицинска и логистичка помош во врска со нивната грижа“, се вели во соопштението на Министерството за одбрана.

Во официјалното соопштение се наведува и дека помошта е испратена „по наредба на претседателот на Републиката и врховен командант Александар Вучиќ“.

Министерот за одбрана Братислав Гашиќ, кој претходно изрази сочувство за трагедијата во Кочани, рече дека припадниците на српската воено-медицинска служба ќе направат се за да им помогнат на повредените. „Најмалку што можеме да направиме во оваа ситуација е да му пружиме помош на братскиот македонски народ и да се грижиме за младите кои се нашле во тој ужас. Нашите воени лекари ќе направат апсолутно се за да го зачуваат нивното здравје и што поскоро да ги вратат во семејствата, закрепнати“.

По наредба на премиерот Росен Жељазков, авион „Спартан“ на бугарското воено воздухопловство отпатува за Република Северна Македонија кој во бугарските болници ќе превезе пет лица тешко повредени во пожарот во градот Кочани, соопшти бугарската Влада.

Во авионот патуваат бугарски медицински тимови, составени од лекари на интензивна нега и специјалисти за изгореници. Повредените ќе бидат примени на специјализирани одделенија за изгореници во болниците во Софија и Варна.

Дополнително, итно е ставена во готовност клиничката база во болниците во Софија, Варна и Благоевград за да се примат повредени лица доколку има потреба. Бугарските болници се подготвени да примат уште повредени по координација со властите на Република Северна Македонија, информира Владата во Софија.

Тројца тинејџери со изгореници здобиени во пожарот во дискотеката во Кочани ќе бидат пренесени во болницата Папаниколау во Солун, потврди во разговор со дописничката на МИА од Атина, претседателот на грчката федерација на вработени во државните болници Михалис Јанакос.

Според Јанакос, солунската болница располага со Одделение за изгореници со четири кревети, денеска биле испразнети три и очекуваат повредените да бидат пренесени во Солун и хоспитализирани во Папаниколау.

Информацијата ја потврдија и од Кризниот штаб при Министерството за здравство.

„Во тек се припремите. Иницијално тројца за Грција. Во тек е останатото организирање и тријажирање“, велат од Штабот.

Од Клиничката болница „Аџибадем Систина“ соопштија дека три нивни возила ќе транспортираат повредени сместени на КАРИЛ за лекување во соседна земја.

 

Во моментов нема коментари за веста. Биди прв да коментира...

Остави коментар