Кочани, 48 часа потоа: Што знаеме досега?

Македонија деновиве се соочува со болка и тага по веројатно најголемата трагедија од осамостојувањето. Во голем пожар што избувна рано утрото на 16 март во дискотеката „Пулс“ во Кочани животот го загубија 59 млади лица, а над 160 се повредени. Според досегашните информации, причина за пожарот најверојатно е несоодветна употреба на пиротехнички средства во дискотеката при концерт на македонската музичка група ДНК. Најголем број од загинатите се на возраст од 14 до 25 години, од Кочани, Штип, Пробиштип, Скопје и други места, кажа директорката на кочанската болница, каде што првиот повик дека има пожар го добиле околу 2:50 часот утрото на 16-ти. Првично стигнале 70 пациенти, кои биле со изгореници и со труења од јаглерод моноксид, а потоа повредените беа испратени во болниците во Штип, Велес и во Скопје. Во пожарот животот го загубија и пејачот на ДНК, Андреј Ѓорѓиевски, и уште неколку музичари од групата.

Bloomberg Adria

 

Низа неправилности во дискотеката

Повеќе од 22 лица досега имаат статус на осомничен за пожарот што изби во дискотеката. Тие се сомничат за кривичното дело „тешки дела против општата сигурност“, за кое е предвидено казна затвор од најмалку три години без горна граница на казнување, односно до 20 години, соопшти министерот за внатрешни работи Панче Тошковски на 17 март.

Министерот изјави дека од извршениот увид во текот на вчерашниот ден се констатирани низа неправилности во дискотеката - немала лиценца, објектот бил наменет за лесна индустрија, а не за угостителска дејност, не биле испочитувани правилата за противпожарна заштита, немало излези за евакуација, а концертот бил одржан на диво, без договор меѓу организаторот и изведувачите. За време на концертот имало околу 500 лица, а официјално биле продадени 250 билети.

МИА

 

Според Тошковски, по извршен разговор со еден од членовите на ДНК, констатирано е дека бендот ја донел пиротехниката во диското, а лицето што било задолжено за ракување со неа, за жал, загинало во пожарот.

„Македонија нема систем со правила на игра што би превенирале ваков ужасен настан. Имаме системски слабости што оневозможуваат контрола. Констатиравме дека системот во Македонија е корумпиран на тоа ниво што можеме да кажеме дека има катастрофална состојба на постапување на институциите“, потенцира Тошковски.

Министерот најави дека ќе бидат приведени поголем број лица од различни институции, меѓу кои и од МВР. 

Притвор и за поранешни високи функционери

Државниот јавен обвинител Љупчо Коцевски рече дека обвинителството бара краткотраен притвор за 14 лица, меѓу кои е и поранешниот министер за економија од редовите на ДУИ, Крешник Бектеши. Тој по 24 часа минати во полициската станица во Карпош, синоќа беше спроведен во кочанскиот суд, каде што требаше да даде исказ.

Во меѓувреме, веќе и официјално е соопштено дека судија на претходна постапка им одредил краткотраен притвор од 48 часа на Бектеши, на поранешниот директор на Државниот пазарен инспекторат Горан Трајковски и на уште 12 лица осомничени за пожарот во дискотеката.

 

Владата го задолжи Државниот пазарен инспекторат да изврши вонреден инспекциски надзор врз угостителски објекти (кабаре, ноќен клуб, дискотека и дискотека на отворен простор) на територијата на државата и за наодите од надзорот веднаш да ја известат Владата, за да се утврди фактичката состојба дали тие работат според стандардите и ги исполнуваат условите во согласност со законите и прописите на државата.

„Во 2024 година се издадени вкупно 12 лиценци за кабареа. Можете да претпоставите колку клубови работат во државата, а само 12 поседуваат лиценца“. Ова на 17 март го изјави премиерот Христијан Мицкоски одговарајќи на прашањето дали има информација колку ноќни клубови во земјава имаат валидни лиценци. Тој претходно обелодени дека лиценцата за работа на дискотеката е фалсификувана и издадена на 13 март 2024 година, со важност од една година, а на неа стои потписот на тогашната државна секретарка во Министерството за економија, Размена Чекиќ-Дуровиќ, а министер во тоа време е Крешник Бектеши.

„Од тие 12, не знаеме кои сè уште се валидни, бидејќи на некои претпоставувам рокот им е изминат, оти се со важност од една година“, рече тој.

Влада

 

Тој посочи дека ги очекува многу работа, оти е очигледно дека некој не си ја вршел работата и сега се обидува под наводно некаква политизација да ја скрие криминалната работа што ја правел изминатите години додека раководел со таа институција.

„Нема да има милост. Тоа го кажав и вчера. Ќе го повторам и денеска. Кој сака нека биде. Од каква етничка припадност и од која сака политичка партија. Тоа што се случувало е повеќе од криминал. Ова е масовно убиство што некој го дозволувал за пари, за мито, за корупција да се случи“, кажа премиерот.

Апели за сплотување на нацијата

Претседателката на државата Гордана Силјановска-Давкова во неделата на 16 март во обраќање до јавноста порача дека не е време на делби и конфронтации и дека никој што е одговорен нема да ги избегне правдата и казната. 

„Не е време за делби и конфронтации, особено кога се во прашање млади луѓе, чиј живот за миг згасна поради самоволие, импровизација и манипулација. Без стандарди и правила не смее да функционира ниту една дејност и активност. Ниту еден одговорен овој пат не смее да ги избегне правото, правдата и казната“, рече Силјановска-Давкова.

На сплотување повика и претседателот на опозициската СДСМ, Венко Филипче, кој рече дека „сега не е време за поделби“.

„Треба да покажеме верба во принципите, во правдата и во институциите. Секој што носи одговорност мора да се соочи со последиците, а секој чин на морална одговорност е добредојден“, рече Филипче.

Дополнително, тој апелираше до безбедносните служби внимателно да ги следат состојбите и да спречат евентуални обиди за продлабочување на кризата.

Граѓаните гневни

Граѓаните во Кочани во текот на целиот вчерашен ден протестираа, барајќи одговорност за трагедијата во ноќниот клуб „Пулс“. Револтираните граѓани протестниот марш го почнаа од градскиот парк, а потоа продолжија пред Обвинителството и пред Основниот суд во Кочани. „Бараме правда“ и „убијци“ беа повиците на граѓаните. Протестот продолжи пред кафулето што му припаѓало на сопственикот на опожарениот ноќен клуб, а демонстрантите го демолираа. Тие исто така го превртеа автомобилот што, според демонстрантите, е во сопственост на истиот човек. Протести имаше и пред куќата на градоначалникот на општината Кочани, Љупчо Папазов, кој претходно во текот на денот поднесе оставка. Луѓето фрлаа камења и јајца кон неговиот стан.

МИА

 

Со одлука на Владата, на територијата на целата држава се прогласува седумдневна жалост. Во оваа смисла, од Владата предупредуваат на ригорозни казни во случај на непочитување и непридржување до оваа одлука. Додека траат деновите на жалост, во Министерството за надворешни работи и надворешна трговија ќе биде отворена книга на жалост за, како што посочуваат од Владата, огромната несреќа.

На платото на УКИМ се одржа заеднички час на студенти и професори во спомен на жртвите во пожарот во Кочани. Собирот беше организиран од Универзитетското студентско собрание (УСС) при УКИМ, а со кратки говори на сочувство се обратија ректорката на УКИМ, Биљана Ангелова, и министерката за образование и наука Весна Јаневска. Обраќањата на Ангелова и Јаневска накратко беа прекинати за да биде интервенирано со итна медицинска помош за студенти на кои им се слошило. Подоцна УСС јавно се извини поради говорите на Ангелова и Јаневска, откако тие беа исвиркани од дел од присутните. Оттаму велат дека ги прифаќаат критиките во врска со настанот и додаваат дека на наредните собири, кои се предвидени до 21 март, нема да има никакви обраќања.

МИА

 

Помош од сите страни

Владата донесе заклучок за активирање на механизмот за барање меѓународна помош. Над 70 најкритични повредени во пожарот веќе се пренесени во болници во соседството и регионот, откако многу држави понудија помош во овие тешки и трауматични моменти за земјава. Србија прими 17 пациенти во четири болници, а најавено е дека ќе пристигнат уште 12. Во соседна Бугарија се лекуваат 14 пациенти, кај кои, според тамошните лекари, состојбата е тешка кај сите. Исто така, петмина пациенти се пренесени во Грција, а деветмина во Турција. Повредени примија и Унгарија и Литванија, а според најавите, уште десетмина ќе бидат испратени на лекување во Словенија, Хрватска и во Австрија. Голем број македонски граѓани што живеат или работат во државите во кои има хоспитализирани лица преку социјалните мрежи нудат помош и бесплатно сместување за семејствата на повредените.

Александар Димитриоски/Bloomberg Adria

 

За трагедијата во Кочани известија повеќе светски медиуми и новински агенции, а пораки со сочувство испратија политичари и функционери од повеќе земји. Преку телеграма потпишана од кардиналот државен секретар Пјетро Паролин порака на сочувство испрати и папата Франциск. Србија и Црна Гора се солидаризираа со нашата земја и на тој начин што прогласија по еден ден на жалост за трагедијата.

 

 

Ажурирано со бројот на пациенти кои се лекуваат во соседството и регионот и одредената мерка краткотраен притвор

Во моментов нема коментари за веста. Биди прв да коментира...

Остави коментар