Рангирање: Финците се најсреќни луѓе во светот, Македонците се најнесреќни во регионот

Финска останува најсреќна земја во светот осма година по ред. На глобалното рангирање, Македонија е сместена близу дното, меѓу најнесреќните во светот, односно на 86-то место.

На првите пет позиции на листата се и Данска, Исланд, Шведска и Холандија. Рангирањето се прави врз основа на одговорите што луѓето ги даваат кога одговараат на прашања поврзани со квалитетот на нивниот живот.

Bloomberg

На најновата листа САД се сместени на 24-то место, што е најниско ниво откако се прави глобалното рангирање за оцена на сопствениот квалитет на живот, според истражувачите.

Македонија е најнесреќна и од сите земји во регионот, а најсреќни се граѓаните на Словенија.

Студијата е објавена денеска од Центарот за истражување на благосостојбата на Универзитетот во Оксфорд, а составена во партнерство со „Галуп“ и Мрежата за решенија за одржлив развој на ОН.

Новите наоди од извештајот вклучуваат дека „вербата во добрината на другите е многу потесно поврзана со среќата отколку што се мисли“, велат истражувачите, наведувајќи ја важноста на социјалната доверба.

„Верувањето дека другите се подготвени да ви го вратат изгубениот паричник исто така се покажа како силен показател за среќата на населението: нордиските нации повторно се најдоа на врвот на листата на најсреќни земји во светот, но тие исто така се рангирани меѓу првите по очекуваното и реалното враќање на изгубените паричници“, се наведува во извештајот.

Рангирањето на земјите се заснова на тригодишен просек на самопроцена на квалитетот на животот на населението. Варијациите се објаснуваат со фактори како што се бруто-домашниот производ по жител, здравиот животен век, да се има на кого да се смета, чувството на слобода, дарежливоста и перцепциите за корупција.

Во моментов нема коментари за веста. Биди прв да коментира...

Остави коментар