Објавена листа на сите жртви во пожарот, повредените се во стабилна состојба

Сите пациенти што се лекуваат тука и надвор од државата се во стабилна и добра состојба, повеќето се подобруваат, а од вкупно 20 што беа критични, денеска констатиравме дека 10 се потешки, но и тие се стабилни, надвор од животна опасност, соопшти министерот за здравство Арбен Таравари.

Како што изјави Таравари, во државава се лекуваат 72 пациента, а надвор 101 пациент. Од оние што се лекуваат во земјава, тројца вчера веќе се испишани, а утре се планира да бидат испишани уште тројца.

„Од идната недела се надевам ќе ве известуваме за тоа колку пациенти го продолжуваат лекувањето дома и за такви што ќе се враќаат од странските држави“, истакна Таравари.

Според него, од пациентите во државава, 34 се на Клиничкиот центар, 15 се во ГОБ „8 Септември“, во Градската општа болница се хоспитализирани 11, а во Штип е еден пациент. Од приватните клиники, во „Систина“ се згрижени седум пациенти и во „Жан Митрев“ четворица.

„Надвор се 101 пациент, вчера се испратени помал број пациенти, денеска има понуди од повеќе држави, но ќе видиме, можеби максимум 10 да се испратат, а можеби и не“, рече Таравари. 

Инаку, во Кочани денеска им се оддава последна почит на загинатите во пожарот во ноќниот клуб „Пулс“. На плоштадот има граѓани што палат свеќи и се запишуваат во книгата на жалост, јави МИА.

Погребната церемонија започна во 12 часот, а со неа чиноначалствуваше поглаварот на Македонската православна црква-Охридска архиепископија, г.г. Стефан. 

Погребни церемонии се одржуваат и во Штип, Облешево и Скопје. 

Во пожарот во дискотеката загинаа 59 лица, а над 150 се повредени. 

Во меѓувреме, Министерството за здравство попладнево ги објави имињата на жртвите во пожарот што се случи рано наутро во неделата.

„Ги објавуваме имињата на жртвите и замолуваме да не се шпекулира со невистинити информации“, се наведува во соопштението на Министерството.