text size
Иако е договорен прекин на огнот во Црно Море, официјален Кремљ наведува дека неговото учество во тоа ќе зависи од низа предуслови. Сагата околу протекувањето на информациите за американската национална безбедност продолжува, додека цената на бакарот на берзата во Њујорк достигна рекордно ниво.
ПОЛИТИКА
Договор за примирје во Црно Море
Американски официјални лица соопштија дека Русија и Украина се договориле за прекин на огнот во Црно Море. Сепак, официјален Кремљ потврди дека неговото учество во договорот ќе зависи од низа предуслови, вклучувајќи ублажување на санкциите. Во одделни соопштенија Белата куќа наведува дека тридневните разговори на техничко ниво во Саудиска Арабија, со тимови од Русија и од Украина, резултирале со договори „што обезбедиле безбедно пловење“ во Црно Море.
Двете страни исто така се согласиле за спречување на употребата на комерцијални бродови за воени цели, се додава во соопштението. Од друга страна, САД ќе помогнат „Русија да се врати на светските пазари за извоз на земјоделски производи и ѓубрива, да се намалат трошоците за поморско осигурување и да се подобри пристапот до пристаништа и системи за плаќање за такви трансакции“.
Трамп за протекувањето на доверливите информации
Продолжува сагата околу протекувањето на информациите за американската национална безбедност. Имено, сега се огласи и претседателот Доналд Трамп, кој порача дека ниту една доверлива информација не била споделена на шифрираната апликација Сигнал (Signal). Трамп рече и дека неговата администрација започнала истрага за тоа како уредникот на порталот „Атлантик“ (Atlantic) случајно бил додаден во група што содржела детали за плановите за воени удари врз Јемен.
БЕРЗИ
Цените на бакарот на историски максимум
Цените на бакарот на берзата во Њујорк пораснаа на рекордно ниво, бидејќи трговците очекуваат воведување големи американски увозни царини на овој метал. Па така, цената на бакарот вчера порасна на 5,22 долари по фунта, надминувајќи го претходниот рекорд од 5,19 долари достигнат на 20 мај.
Европа
Фјучерсите на европските акции утрово се тргуваат во зелено, продолжувајќи го нагорниот тренд од претходниот ден. Имено, инвеститорите се нешто пооптимистични во поглед на новите американски царини, а откако претседателот Доналд Трамп најави дека новиот пакет од 2 април ќе биде поблаг отколку што се очекуваше.
САД
Истовремено, фјучерсите на американските индекси се тргуваат мешано, откако најновите податоци ја зголемија загриженоста кога станува збор за растот на најголемата светска економија. Имено, довербата на американските потрошувачи во март падна на најниско ниво во последните четири години, поради загриженост за повисоките цени, но и ескалацијата на царинската војна.
Азија
Акциите во азиско-пацифичкиот регион се тргуваат главно со добивки. Индексот Hang Seng Tech зајакна дури 1,6 проценти, откако претходниот ден беше на работ на корекција. Истовремено, стратезите на „Морган Стенли“ (Morgan Stanley) и на „Голдман Сакс“ (Goldman Sachs) ги зголемија изгледите за вредноста на кинеските акции, наведувајќи ја како причина очекуваната подобра состојба на кинеската економија.
НАФТА
Цената на нафтата остана стабилна бидејќи извештајот за индустријата покажа голем пад на американските резерви на сурова нафта, додека пазарот ја разгледуваше можноста за примирје меѓу Русија и Украина во Црно Море.
Брентот се тргуваше по цена нешто поголема од 73 долари за барел, откако во вторникот на затворањето на пазарот цената остана речиси непроменета. Вредноста на ВТИ (West Texas Intermediate) беше близу 69 долари за барел. Резервите во САД паднаа за 4,6 милиони барели минатата недела, според податоците на Американскиот нафтен институт, што би било најголем пад од ноември 2024 година ако тоа биде потврдено со официјални податоци денеска.
.webp){kind=icon}
