Доларот паѓа, а златото е на нов рекорд. Глобалните акции и обврзници флуктуираат денеска, на првиот работен ден на берзите по празниците, додека инвеститорите го чекаат исходот од трговските преговори на САД со партнерските земји. Трговците се загрижени и поради најавите дека американскиот претседател можеби се подготвува да го разреши претседателот на Федералните резерви (Фед), Џером Пауел, што дополнително ја поттикнува нервозата на пазарите. Инвеститорите оваа недела ги чекаат и деловните резултати на „Тесла“ и „Алфабет“, за да добијат насоки за тоа како компаниите се справуваат во новонастанатото глобално опкружување.
ПОЛИТИКА
Нова рунда мировни преговори
Делегација на САД в среда во Лондон ќе разговара со украински и европски официјални лица, бидејќи американскиот претседател Доналд Трамп се залага за договор за прекин на огнот во Украина. Се очекува дека американскиот државен секретар Марко Рубио и специјалните претставници на Трамп, Стив Виткоф и Кит Келог, ќе се сретнат со министрите за надворешни работи и советниците за национална безбедност на Франција, Германија, Велика Британија и Украина.
Предлогот на САД, практично, подразбира замрзнување на конфликтот кој сега е во својата четврта година, при што Русија дефакто би задржала контрола над поголемиот дел од територијата која е под окупација на руските сили на истокот и југот на Украина.
ОПШТО
Светот се простува од папата Франциско
Целиот свет му оддава почит на поглаварот на Римокатоличката црква, папата Франциско, кој почина на 88-годишна возраст. Да потсетиме, папата овој февруари беше примен во римската болница Џемели, поради проблеми со дишењето, и тогаш беше соопштено дека е лекуван од двострана пневмонија. Причината за смртта е мозочен удар кој довел до кома и последична неповратна срцева инсуфициенција, се наведува во соопштението на Ватикан.
Сè уште не е познат датумот на погребот на папата, кој според правилата мора да се одржи меѓу четвртиот и шестиот ден од неговата смрт.
БЕРЗИ
Европа
Фјучерсите на европските акции во вторник наутро се тргуваат претежно во црвено. Да потсетиме, повеќето меѓународни пазари не работеа во понеделник, поради одбележувањето на Велигден.
САД
Истовремено, фјучерсите на американските акции моментално се тргуваат во зелено, така што е намален дел од претходните загуби. Имено, индексот S&P 500 претходно падна за повеќе од два процента, откако американскиот претседател на социјалната мрежа Трут (Truth Social) објави дека економијата ќе забави ако Фед не ги намали каматните стапки. Трамп повторно го критикуваше првиот човек на Фед, нарекувајќи го „голем губитник“.
Американскиот долар четврти ден по ред се тргува со загуби, бидејќи инвеститорите се загрижени поради недоволниот напредок во трговските преговори меѓу САД и партнерските земји.
Азија
Кога станува збор за акциите во азиско-пацифичкиот регион, тие се тргуваат мешано. Јапонските фирми во голема мера ги чувствуваат последиците од царинската политика на Трамп, а меѓу нив 10 проценти тврдат дека зголемените царини негативно влијаеле на бизнисот. Поради растечката неизвесност, инвеститорите сè повеќе се насочуваат кон златото, чија вредност во еден момент достигна рекордни 3.444 долари за унца.
.webp){kind=icon}
