Доналд Трамп сака војната во Украина да заврши што е можно побрзо, па го зголеми притисокот врз претседателот Володимир Зеленски да прифати мировен договор. Трамп исто така изјави дека конечните царински стапки за Кина може наскоро да стапат во сила. Пекинг се подготвува да ги укине санкциите за европските функционери. Фјучерсите на европските акции утрово се тргуваат во црвено.
ПОЛИТИКА
Трамп повторно го критикува Зеленски
Американскиот претседател Доналд Трамп го зголеми притисокот врз украинскиот претседател Володимир Зеленски да прифати мировен договор, обвинувајќи го украинскиот лидер дека ја продолжува војната, која трае веќе четврта година. „Мислам дека имаме договор со Русија. Мораме да се договориме со Зеленски. Мислев дека ќе биде полесно да се справиме со него, но досега се покажа тешко“, изјави Трамп во Овалната соба на Белата куќа.
Трамп за трговската војна со Кина
Откако американскиот претседател најави дека САД ќе имаат фер договор со Кина, Трамп во средата изјави дека конечните царински стапки за таа земја може да стапат во сила за две-три недели. Администрацијата на Трамп исто така разгледува дали да намали одредени царини за автомобилската индустрија, кои, како што тврдат челниците од автоиндустријата, би им нанеле сериозен удар на профитот и работните места.
Кина ги укинува санкциите за европските законодавци?
Официјален Пекинг се подготвува да ги укине санкциите што ги воведе за европските законодавци пред четири години, пишува „Фајненшл тајмс“ (Financial Times). Тој потег, како што е оценето, би можел да доведе до оживување на инвестицискиот договор меѓу двете страни, и тоа токму во момент кога американските царини ја погодија кинеската економија. „Разговорите со кинеските власти продолжуваат и се во завршна фаза“, изјави портпаролот на претседателката на Европскиот парламент.
БЕРЗИ
Европа
Фјучерсите на европските акции утрово се тргуваат во црвено. Потсетуваме, европските пазари вчерашното тргување го завршија во зелено, бидејќи се врати апетитот на инвеститорите за преземање ризик, со надеж дека трговската војна меѓу САД и Кина сепак може да биде избегната.
Bloomberg
САД
И фјучерсите на американските индекси се тргуваат со загуби, по мешаните сигнали од администрацијата на Трамп за царинските планови за Кина. И американскиот министер за финансии Скот Бесент изјави дека САД не сакаат еднострано да ги намалат царините за Кина и дека за постигнување сеопфатен трговски договор може да бидат потребни две-три години.
Азија
Кога станува збор за акциите во азиско-пацифичкиот регион, тие се тргуваат претежно во црвено, со што се прекина петдневната добитничка низа. Така, хонгконшкиот индекс Hang Seng падна за 1,2 проценти, додека шангајскиот композитен индекс ослабе за 0,1 процент.
НАФТА
Нафтата забележа пад бидејќи инвеститорите ги проценуваат изгледите за поголема понуда од ОПЕК+ и последиците од трговските тензии меѓу САД и Кина.
Брентот се тргува близу 66 долари за барел по падот од два процента во средата, додека ВТИ (West Texas Intermediate) е над 62 долара. Неколку члена на групата производители ќе бараат уште едно зголемување на понудата во јуни, бидејќи спорот околу почитувањето на квотите се влошува, извести „Ројтерс“, повикувајќи се на извори запознаени со прашањето. Организацијата на земјите извознички на нафта и нејзините сојузници ќе одржат состанок на 5 мај за да одлучат што да прават во јуни.
.webp){kind=icon}
