Повеќе од 200 лица се пронајдени мртви на местото на несреќата на авионот „Боинг Ко. 787 Дримлајнер“ на „Ер Индија“, кој се упатил кон Лондон, соопштија полициски службеници.
Авионот „Боинг“ на „Ер Индија“ (Air India Ltd.), што патуваше од Ахмедабад во Индија до аеродромот Гетвик во Лондон се урна кратко по полетувањето. Ова се смета за најсериозната несреќа во која е вклучен најнапредниот широкотрупен авион на американскиот производител на авиони.
Авиокомпанијата соопшти дека летот AI171 бил „вклучен во инцидент“ и дека „Ер Индија“ „ги утврдува деталите“. Снимките споделени на социјалните мрежи покажаа огромен облак од чад како го опфаќа местото на несреќата и засега нема извештај за жртви или преживеани. Летот превезувал 242 патници и членови на екипажот, според новинската агенција АНИ. Меѓу нив, 169 се индиски државјани, 53 се британски државјани, еден е Канаѓанец и седуммина се Португалци, според „Ер Индија“, која соопшти дека повредените се префрлени во најблиските болници.
Авионот се урна во населено место, паѓајќи врз хостел за медицинари.
Bloomberg
Видео снимките го покажуваат авионот со сė уште вклучен слетувачкиот систем како кратко по полетувањето полека се спушта, пред да експлодира во огромен огнен облак по ударот. Двомоторниот авион достигнал надморска височина од 625 стапки со брзина од 174 јазли во секунда, според податоците од „Флајтрадар24“ (Flightradar24).
Аеродромот Гетвик, втор по големина во областа на Лондон, потврди дека авионот кој требаше да слета во главниот град на Велика Британија во 18:25 часот по локално време се урнал.
Несреќата е продолжение на серијата сериозни и фатални инциденти во индустријата за цивилното воздухопловство оваа година, вклучувајќи го и судирот во воздух над Вашингтон на почетокот на 2025 година помеѓу воен хеликоптер и авион. „Ер Индија“ е сред стратешки пресврт што вклучува огромна нарачка на авиони, бидејќи се обидува да ја искористи растечката побарувачка од растечката индиска средна класа.
„Тата груп“, која е сопственик на превозникот, во соопштението изјави дека летот 171 на „Ер Индија“, кој сообраќа од Ахмедабад до Лондон Гетвик, бил вклучен во несреќа.
Акциите на „Боинг“ паѓаат и до моментот на последното ажурирање загубија 8,7 проценти од својата вредност. Моделот 787 е најнапредниот авион во употреба на компанијата и е популарен кај авиокомпаниите бидејќи е поефикасен во однос на горивото благодарение на употребата на лесни композитни материјали.
Американскиот производител на авиони беше вклучен во неколку несреќи во последните години, вклучувајќи две фатални несреќи со летот 610 на „Лајон Ер“ на 29 октомври 2018 година и летот 302 на „Етиопијан Ерлајнс“ на 10 март 2019 година. На почетокот на минатата година авион „737 Max“ за време на лет изгуби панел од врата. Иако немаше жртви, несреќата ја втурна компанијата во длабока криза.
Авионот вклучен во денешната несреќа ја носел регистрацијата „VT-ANB“ и бил стар речиси 12 години. Авионот бил напојуван од два мотори на „Џенерал електрик“ (General Electric Co. GEnxAP).
AP (Bloomberg)
Според индискиот регулатор за цивилно воздухопловство, пилотите веднаш по полетувањето издале предупредувачки повик до контролорите на летање. Авионот бил под команда на капетанот Сумит Сабахарвал и првиот заменик пилот Клајв Кундар, кои имале 8.200 и 1.100 часови летање, соодветно, соопшти Управата за цивилно воздухопловство.
Според податоците од контролата на летање, авионот полетал од Ахмедабад во 13:39 часот по локално време, користејќи ја пистата 23. По првичниот предупредувачки повик, немало одговор од пилотската кабина на последователните повици направени од контролорите на земја.
„Ер Индија“ управува со 34 авиони „Боинг 787“, според податоците од консултантот за авијација „Сириум“ (Cirium). Нивната возраст се движи од нешто над две години до речиси 14, а повеќето се стари повеќе од една деценија. Авиокомпанијата во својата флота поседува вкупно 192 авиони „Боинг“ и „Ербас“. Во 2023 година „Тата“ потпишаа огромна нарачка од 470 авиони за да ги замени застарените модели што ги наследи со нови авиони, со што би се овозможил раст на авиокомпанијата.
По денешната несреќа, Меѓународниот аеродром „Сардар Валабхаи Пател“ во Ахмедабад беше затворен. „Ер Индија“ започна со работа од Гетвик во 2023 година, кога лансираше четири нови рути, вклучувајќи го и Ахмедабад.
Текстот е напишан со помош од Сатвики Санџај, Ентони Палацо и Кејт Дафи.
(Текстот постојано ќе се ажурира со детали од несреќата. Последното ажурирање со бројот на пронајдени жртво во првиот параграф.)
.webp){kind=icon}
