Американскиот претседател Доналд Трамп порача дека царини на фармацевтските производи најверојатно ќе бидат воведени веќе до крајот на овој месец, а дека наскоро би можеле да следат и царини на чиповите.
Споменатите царини би можеле да се совпаднат со пошироките „реципрочни“ царински стапки, чие спроведување треба да започне на 1 август. Трамп навести и дека би можел да склучи трговски договори со одделни земји пред да ги воведе реципрочните царини, споменувајќи го договорот со Индија како еден од најверојатните.
ЕКОНОМИЈА
Бесент: Пауел да се повлече од Фед
Во меѓувреме, американскиот министер за финансии, Скот Бесент, предложи претседателот на Федералните резерви, Џером Пауел, да се повлече од позицијата во управниот одбор по истекот на неговиот претседателски мандат, во мај 2026 година. Мандатот на Пауел како член на управниот одбор завршува дури во јануари 2028 година. Наскоро по таа изјава, Трамп изјави дека Бесент е „една од опциите“ за позицијата претседател на Фед.
Франција укинува два државни празника?
Францускиот премиер Франсоа Бајру предложи укинување на два национални празника, како дел од планот за подобрување на состојбата со јавните финансии. Бајру изјави дека земјата е зависна од јавната потрошувачка и се наоѓа во „смртна опасност“, со долг кој се зголемува за 5.000 евра секоја секунда.
БЕРЗИ
Европа
Фјучерсите на европските акции утрово претежно се тргуваат во минус. Потсетуваме, европските берзи и вчерашното тргување го завршија со пад, при што најголеми загуби имаа акциите на големите компании од финансискиот и здравствениот сектор. Инвеститорите продолжуваат да ги очекуваат вестите за можен трговски договор меѓу САД и ЕУ, како и да ги проценуваат најновите податоци за инфлацијата во Америка.
САД
И фјучерсите на американските индекси се тргуваат со загуби, откако најновите податоци за инфлацијата покажаа дека компаниите почнуваат да ги префрлаат трошоците поврзани со царините врз потрошувачите. Имено, вкупната инфлација минатиот месец забрза повеќе од очекуваното – достигнувајќи 2,7 отсто во споредба со 2,4 отсто во мај.
Истовремено, базичната инфлација, која генерално се смета за подобар показател за долгорочните инфлаторни трендови, порасна помалку од очекуваното, бележејќи забавување петти месец по ред. По овие податоци, трговците ги намалија обложувањата дека Фед ќе ги намалат каматните стапки оваа година, при што шансите за таков потег во септември сега се нешто над 50 отсто.
Азија
Акциите во азиско-пацифичкиот регион се тргуваат мешано – помеѓу добивки и загуби – откако американскиот претседател Доналд Трамп изјави дека постигнал прелиминарен трговски договор со Индонезија, кој предвидува царини од 19 отсто на извозот на таа земја во САД. Акциите на технолошките компании во Хонгконг особено се издвојуваат по добивките, по веста дека „Енвидија“ (Nvidia) ќе ја обнови испораката на своите чипови за вештачка интелигенција во Кина.
.webp){kind=icon}
Во моментов нема коментари за веста. Биди прв да коментира...