Финансиските пазари овој четврток се во знак на исчекување на одлуката на Европската централна банка (ЕЦБ), за која се очекува по повеќе од една година за првпат да направи пауза во намалувањето на каматните стапки. Истовремено, вниманието на инвеститорите е насочено кон напредокот во трговските преговори помеѓу САД и ЕУ, кои би можеле да го оформат понатамошниот тек на глобалната економска политика. На корпоративен план, „Алфабет“ изненади со подобри приходи од очекуваните, додека „Тесла“ разочара со пад на продажбата и предупредување од Илон Маск за предизвици во кварталите што претстојат. Берзите низ светот реагираат со раст, како во Европа и Америка, така и во азиско-пацифичкиот регион, поттикнати од надежта за стабилизација на трговските односи и нови најави од централните банки.
ЕКОНОМИЈА
Каматните стапки остануваат на два отсто, намалување е можно наесен
Европската централна банка (ЕЦБ) денеска ја носи одлуката за висината на клучните каматни стапки. Економистите на „Блумберг“ очекуваат дека ЕЦБ, по повеќе од една година, ќе ги задржи каматните стапки непроменети, додека чека појаснување за тоа како царините на американскиот претседател Доналд Трамп ќе влијаат на инфлацијата.
Така, ЕЦБ ќе ја задржи каматната стапка на депозитите на два отсто, според тврдењата на повеќето економисти анкетирани од „Блумберг“. Сепак, економистите очекуваат уште едно намалување од четвртина процентен поен во септември, до кога би требало да биде постигнат трговскиот договор со САД. Аналитичарите на „Блумберг Адрија“ исто така се согласни дека Советот на ЕЦБ овој пат ќе направи пауза и ќе ја остави можноста за дополнително намалување на каматните стапки до крајот на 2025 година.
Напредок во трговските преговори помеѓу САД и ЕУ
Европската Унија и САД напредуваат кон договор за царини од 15 отсто за поголемиот дел од увозот од европскиот блок, тврдат дипломати запознаени со преговорите. Истовремено, увозот на челик и алуминиум над одредена квота би се соочил со повисока царина од 50 отсто. Од друга страна, ЕУ подготвува контрамерки, вклучувајќи пакет царини на американска стока во вредност од 100 милијарди евра, доколку договорот не биде постигнат до 1 август.
КОМПАНИИ
Акциите на „Алфабет“ пораснаа по затворањето на берзата, бидејќи компанијата оствари подобри приходи од очекуваното. Наспроти тоа, акциите на „Тесла“ паднаа за 4,4 отсто, откако Маск предупреди на „неколку тешки квартали што следуваат“, бидејќи продажбата на производителот на електрични автомобили забележа најголем пад во последните десет години.
БЕРЗИ
Европа
Фјучерсите на европските акции во четвртокот наутро се тргуваат во зелено, во пресрет на одлуката на Европската централна банка за висината на клучните каматни стапки.
САД
Истовремено, фјучерсите на американските акции се тргуваат претежно со добивки, со надеж дека САД ќе склучат нови трговски договори. Деескалацијата на глобалните трговски тензии ги смири инвеститорите, ублажувајќи го нивниот страв од долготрајна трговска војна. Потсетуваме дека САД пред два дена постигнаа трговски договор со Јапонија, во чии рамки Токио, меѓу другото, вети инвестиции од неколку стотици милијарди долари во САД.
По тој повод се огласи американскиот министер за трговија Хауард Лутник, кој рече дека договорот со Јапонија може да биде „модел“ за постигнување договор со Европската Унија.
Трговските преговори со Европската Унија ги коментираше и министерот за финансии, Скот Бесент. Тој вели дека е постигнат добар напредок, но дека ЕУ сè уште нема претставено иновативен финансиски пакет сличен на оној од Јапонија.
Азија
Со акциите во азиско-пацифичкиот регион исто така се тргува во зелено. Јапонските референтни индекси пораснаа до два отсто, а со добивки се тргува и јапонскиот јен.
.webp){kind=icon}
