text size
На Блискиот Исток, Хамас прифати договор предложен од Катар и Египет за прекин на војната во Газа, што ги зголемува шансите за долгоочекуваниот напредок во преговорите. Имено, според предлогот од договорот, Хамас се согласи да ослободи половина од израелските заложници што ги држи во Појасот Газа, во замена за ослободување палестински затвореници и делумно повлекување на израелските трупи.
Од почетокот на конфликтот во Газа, според податоците на Министерството за здравство контролирано од Хамас, загинале повеќе од 62.000 Палестинци, додека Обединетите нации предупредија дека половина милион луѓе во Газа се на работ на глад. Повеќе детали за овој предлог открива новинарот на „Блумберг“, Ден Вилијамс.
ПОЛИТИКА
Трамп организира самит Путин-Зеленски
Американскиот претседател Доналд Трамп телефонски го повика рускиот претседател Владимир Путин и побара од него да започне подготовки за средба со украинскиот претседател Володимир Зеленски. Овој повик следуваше по средбата на Трамп со европските лидери и со Зеленски во Белата куќа во понеделникот, на која, меѓу другото, разговараа за безбедносните гаранции за Украина. Трамп најави дека по средбата меѓу Путин и Зеленски би следувал и трилатерален состанок, на кој би учествувал и тој.
Зеленски: Ќе разговараме и за територијата
Во исто време повеќе европски функционери најавија дека очекуваат уште една виртуелна средба со Трамп уште во текот на денот, за да разговараат за деталите на безбедносните гаранции што заеднички би ѝ ги понудиле на Украина. Од друга страна, украинскиот претседател пред новинарите во Вашингтон изјави дека билатералниот состанок не треба да биде проследен со никакви услови и дека е подготвен да разговара за територијални прашања со рускиот колега. Тој исто така изрази задоволство што Трамп се согласил да учествува во обезбедувањето гаранции за безбедност, со цел да се поддржи потенцијален мировен договор.
БЕРЗИ
Европа
Со фјучерсите на европските акции утрово се тргува со добивки, по извештаите за напредок во мировните преговори за крај на војната во Украина меѓу лидерите на САД, Украина и европските земји. Да потсетиме, европските берзи во понеделникот тргувањето го завршија со мали загуби, бидејќи инвеститорите беа воздржани од преземање ризик.
САД
Од друга страна, со фјучерсите на американските индекси се тргува со загуби, откако агенцијата за кредитен рејтинг „Ес енд пи глобал“ (S&P Global Ratings) го потврди долгорочниот кредитен рејтинг на САД на AA+. Во фокусот на инвеститорите е и годишниот економски состанок на Федералните резерви, кој започнува в четврток во Џексон Хоул. Пазарите со нетрпение го очекуваат обраќањето на претседателот на Фед, Џером Пауел, кој би можел да навести во кој правец ќе се движат каматните стапки.
Азија
Истовремено, тргувањето со акции во азиско-пацифичкиот регион е со мешан тренд. Акциите во Јапонија и Кина претежно се во пораст, додека во Јужна Кореја се тргува со загуби.
.webp){kind=icon}
