Велика Британија ќе ја продолжи својата воена тренинг-програма за украинските војници најмалку до крајот на 2026 година, со цел да ѝ помогне на Украина да ја зајакне својата армија пред можното постигнување на мировен договор со Русија, поддржан од САД и Европа.
Британското Министерство за одбрана во саботата соопшти дека програмата „Интерфлекс“, која вклучува обука за борбени вештини и лидерство, ќе продолжи да се спроведува како дел од пошироките напори за гарантирање на безбедноста на Украина по евентуалното завршување на војната.
Во изминатите месеци, биле одржани состаноци со учество на над 200 воени планери и претставници од околу 30 држави. Како дел од подготовките за мировен договор, Велика Британија и Франција ја предводат иницијативата „Коалиција на подготвените“, чија цел е формирање на мултинационални сили што би биле распоредени во Украина, далеку од фронтот, со задача да дејствуваат како одбивачка сила против идни напади.
Првата фаза од планот, според извештај на „Блумберг“, вклучува јакнење на украинските сили преку продолжена обука и воени засилувања. Дополнително, би се ангажирале и трупи од повеќето европски држави, додека САД би придонеле со разузнавачки информации, надзор на границите, снабдување со оружје и можно поставување на воздушна одбрана.
Досега, преку програмата „Интерфлекс“, повеќе од 50.000 украински регрути биле обучени на британска територија.
„Ќе продолжиме да ја засилуваме нашата поддршка заедно со сојузниците, за Украина да може да се брани денес и да одвраќа закани утре“, изјави британскиот министер за одбрана, Џон Хили. „Во услови на постојани руски напади, мора да ја ставиме украинската армија во најсилна можна позиција. Додека продолжува стремежот кон мир, Украина мора да биде најсилниот можен фактор за да се обезбеди тој мир.“
.webp){kind=icon}
