Цената на нафтата во четвртокот падна втор ден по ред, поради стравувањата дека ОПЕК+ би можел повторно да го зголеми обемот на производство на пазарот што веќе е заситен со резерви од сурова нафта. Брентот падна близу 67 долари за барел, додека ВТИ (вест тексас интермедиејт) падна под 64 долари.
ПОЛИТИКА
Прва посета на новиот полски лидер во Вашингтон
Новиот претседател на Полска, Карол Навроцки, доби гаранции од американскиот претседател Доналд Трамп дека САД нема да се повлечат од Полска и дека постои можност за зголемување на бројот на американски војници. Договорот беше постигнат во рамките на првата посета на Навроцки на Вашингтон, при што доби и покана од Трамп да учествува на самитот на Групата 20 следната година.
Овој исход претставува дипломатска победа за новиот полски лидер, чиja изборна кампања беше обележана со остри критики кон Европската Унија и уверувањето дека безбедноста и иднината на Полска лежат во посилни врски со Вашингтон. За време на средбата, претседателот Трамп се осврна и на воената парада што истиот ден се одржа во Пекинг по повод крајот на Втората светска војна, велејќи дека „не им беше оддадена заслужената почит на САД“.
ЕКОНОМИЈА
Американскиот пазар на труд се лади
Инвеститорите низ светот внимателно го следеа извештајот за американскиот пазар на труд, кој е еден од индикаторите што Федералните резерви ги земаат предвид при креирањето на идната монетарна политика. Бројот на нови работни места падна на најниско ниво во последните 10 месеци, поттикнувајќи шпекулации дека Федералните резерви ќе ги намалат каматните стапки на состанокот во септември, како и дека до крајот на годината ќе следуваат уште два вакви чекора.
Сепак, поранешниот министер за финансии Лоренс Х. Самерс предупреди дека претседателот Доналд Трамп „си игра со оган“ со своите постојани притисоци врз Федералните резерви да ја олабават монетарната политика, што кулминираше со обидот за отпуштање на гувернерката Лиза Кук.
Bloomberg
КОМПАНИИ
Ова е одговорот на „Епл“ за ЧетГПТ
Технолошката компанија „Епл“ (Apple) планира да лансира сопствена алатка за пребарување што ќе биде базирана на вештачка интелигенција (ВИ), како дел од гласовниот асистент Сири. Новиот систем, со интерно кодно име ВНА (World Knowledge Answers), ќе пребарува информации на интернет и ќе генерира концизни и точни одговори, по примерот на сличните алатки на конкурентите „Опен еј-ај“ (OpenAI) и „Перплексити“ (PerplexityAI).
„Епл“ ја развива оваа алатка во соработка со „Гугл“, а целта е да стане достапна за јавноста напролет, како дел од долго одложуваниот редизајн на Сири.
БЕРЗИ
Обврзниците се стабилизираа
Пазарот на обврзници се стабилизира по масовната распродажба на долгорочен државен долг во текот на неделава. Приносите на американските 30-годишни државни обврзници паднаа на 4,9 проценти, додека јапонските долгорочни обврзници зајакнаа по успешната аукција на 30-годишниот државен долг. Приносите на британските обврзници во четвртокот наутро не покажаа значајни промени, но 30-годишните државни обврзници остануваат на високо ниво од 5,6 проценти.
Американските и европските фјучерси во четвртокот наутро се тргуваа во позитивна зона, додека на азиските берзи ситуацијата е различна. Денот го обележи масовна распродажба на кинески акции, што го намали индексот CSI 300 за околу 2,5 проценти. Продажбата беше поттикната од најавите на кинеските регулатори дека ќе преземат мерки за „ладење“ на пазарот на акции, поради преголемиот раст на овој сектор, во кој од почетокот на август се влеале дури 1,2 билион долари. Од друга страна, оптимизмот на глобалните берзи го поттикнуваат очекувањата дека Федералните резерви конечно ќе ги намалат каматните стапки овој месец.
СВЕТ
Петнаесет жртви во несреќа во Лисабон
Петнаесет лица загинаа, а осумнаесет се повредени кога популарниот лисабонски трамвај „Глорија“ (Elevador da Glória) излета од шини во средата во раните вечерни часови. Португалските медиуми јавуваат дека кабелот што го поддржува трамвајот пукнал, по што возилото, излетувајќи од шините, удрило во блиска зграда.
Меѓу повредените, пет лица се во критична состојба, а сочувство до семејствата на жртвите изразија претседателот на Португалија, Марсело Ребело де Соуза ,и премиерот Луиш Монтенегро. Популарниот трамвај годишно го користат околу три милиони луѓе, а пред повеќе од две децении е прогласен за национален споменик.
.webp){kind=icon}
Во моментов нема коментари за веста. Биди прв да коментира...