Главни европски аеродроми, меѓу кои во Берлин, Лондон и Брисел, и денеска се соочуваат со доцнења и нарушен проток на патници поради сајбер-напад врз клучниот софтвер за чекирање.
Инцидентот произлегува од сајбер-напад врз КА (Collins Aerospace), кој во петокот вечерта го онеспособи нивниот глобално користен МЈУЗ (MUSE) софтвер. Платформата е критичен дел од работата на авиокомпаниите и ги поддржува процесите на чекирање, качување во авион и обработка на багаж. Со офлајн терминали, персоналот е принуден на рачна обработка на податоците за патниците, што значително го забавува целиот процес.
Аеродромот Берлин-Бранденбург објави дека доцнењата продолжуваат, додека лондонскиот Хитроу соопшти дека „огромно мнозинство на летови“ функционира, но им препорача на патниците внимателно да ја проверуваат состојбата на своите летови пред поаѓање. Дополнително, од патниците се бара да не доаѓаат на аеродромот порано од три часа за меѓународни летови и два часа за регионални.
Бриселскиот аеродром ги презеде најстрогите мерки – побара од авиокомпаниите да откажат половина од предвидените поаѓања за да се намали притисокот врз персоналот. Аеродромот се извини и го наведе „сајбер-проблемот“ кај надворешниот технолошки добавувач како причина за застојот.
Иако засега бројот на откажани летови останува релативно мал во однос на вкупниот дневен авиосообраќај во Европа, инцидентот ја посочува ранливоста на воздухопловната индустрија при нарушувања на критична технолошка инфраструктура. Потполната стабилизација се очекува дури откако КА ќе ја врати целосната функционалност на системот.
Инаку, според извештај објавен во јуни од француската одбранбена компанија „Талес“ (Thales SA), годинава е забележан драматичен пораст на сајбер-напади врз воздухопловниот сектор – зголемување од 600% во споредба со претходната година. Десетици инциденти ги погодиле авиокомпаниите, аеродромите и навигациските системи, што го подигнува алармот за безбедноста на дигиталната инфраструктура во оваа критична индустрија.
.webp){kind=icon}
Во моментов нема коментари за веста. Биди прв да коментира...