Хакерски напад во надворешна фирма-соработник на „Голдман Сакс“

„Голдман Сакс груп“ (Goldman Sachs Group Inc.) ги предупреди инвеститорите во некои од неговите алтернативни инвестициски фондови дека нивните податоци можеби биле откриени при пробив во една од адвокатските фирми на банката.

Во писмо од 19 декември од „Голдман“ изјавија дека биле информирани за „инцидент со сајбер-безбедноста“ од страна на „Фрид Фрeнк Харис Шрајвер и Џејкобсон“ (Fried Frank Harris Shriver & Jacobson LLP), која служи како надворешен советник за многу од нејзините алтернативни фондови. Банката истакна дека соработува со адвокатската фирма за подобро да разбере дали нејзините или податоците на нејзините клиенти можеби биле откриени.

 

Писмото беше вклучено во предложената групна тужба поднесена вчера против „Фрид Френк“ од страна на Ендру Сакс, инвеститор во офшор фондот „Питершил прајват еквити сидинг II“ (Petershill Private Equity Seeding II Offshore Fund) на „Голдман“.

„Системите на ‘Голдман Сакс’ не беа погодени од овој инцидент и остануваат безбедни“, изјави портпарол на банката. „Како и секогаш, ние ќе продолжиме да работиме на заштита на нашите клиенти и нивните податоци“.

Портпаролот на „Фрид Френк“ изјави: „Реагиравме веднаш за да го локализираме инцидентот и ангажиравме водечки надворешни експерти за безбедност на податоци во индустријата, за да ни помогнат во одговорот и во проверката на безбедноста на нашите системи, и го пријавивме случајот во полиција“. Фирмата додаде дека услугата за клиенти не е нарушена.

Според писмото, „Фрид Френк“ го информирал „Голдман“ дека неговата мрежа сега е безбедна и дека ранливоста што доведе до хакерскиот пробив е поправена. Адвокатската фирма изјави и дека сите податоци што биле откриени „веројатно нема да бидат дистрибуирани или неправилно користени“.

„Спроведуваме сопствена процена на безбедносните контроли на компанијата ‘Фрид Френк’ за независно да ги потврдиме нивните напори за санација“, соопштија од „Голдман“ во писмото. „Безбедноста на податоците е од најголема важност и ние сериозно ги сфаќаме овие прашања“.