Американскиот претседател Доналд Трамп изјави дека ги откажал планираните воени напади врз Иран, што претставува остар пресврт само неколку часа откако вети дека ќе ја погоди Исламската Република „МНОГУ СИЛНО“ и се закани дека ќе ја преземе нејзината нафтена инфраструктура.
Трамп во четвртокот се повика на, како што рече, „разговори“ кои „биле пренесени до највисокото ниво на иранското раководство“ во врска со договорен крај на војната. Тој рече дека „времето и местото на потпишувањето“ ќе бидат „објавени наскоро“, без да даде дополнителни детали.
„Јас, како претседател на Соединетите Американски Држави, ги откажав закажаните напади и бомбардирања врз Иран за оваа вечер“, објави Трамп на социјалните мрежи.
Цените на нафтата паднаа за речиси четири отсто, при што нафтата Брент се тргуваше под 90 долари за барел по коментарите на Трамп. Иран сѐ уште не се огласил за изјавата на Трамп.
Овие коментари претставуваат најнов контрадикторен сигнал што Трамп го испрати за војната, движејќи се меѓу закани за интензивирање на нападите и тврдења дека мировен договор е на дофат. Ниту едно од тие сценарија сѐ уште не се реализирало, бидејќи Вашингтон и Техеран остануваат заглавени околу клучни прашања, вклучително и иранската нуклеарна програма и замрзнатите средства.
Трамп изјави дека „разговорите и конечните точки, и концепциски и во големи детали, се одобрени од сите вклучени страни, вклучително и САД, Израел, Саудиска Арабија, Обединетите Арапски Емирати, Катар, Турција, Пакистан, Бахреин, Кувајт, Јордан, Египет и други“.
На списокот не беше вклучен Иран.
Претседателот додаде дека американската поморска блокада на Ормускиот Теснец „ќе остане целосно во сила сѐ додека оваа трансакција не биде финализирана“.
.webp){kind=icon}
